2011 New Year Resolution:

PATHIAN CAWIMAWI

Rev. Hre Mang

Khua pakhatah hlawhhlang nu in hlawhhlang hnatuan in a ngah mi sumpai  thawn an khaw hrang tidai khur a tuah sak, lamzin a sial sak tikah an khawsung mi hmuahhmuah in hlawhhlang nu cu an cawimawi ih khawsungah cawimawinak sangbik an pek. Culai lakah an puithiam pa cu “mi aa, lungruh, hawizawnglo, mi ngiafeo” tiah an zawkzet, an nautat, an zuarthlai. Cuvek thotho in an khaw lalpa khal “mi banglo, sumpai hawl thiam lo, mi aa, lungruh, tvp,” In an hnihsan rero.




 Tuihlan kum rei lo teah America ramah “Strip Dancer” (taw le pawhte lawng hup in zu in nak hmun a lam theu tu) pakhat a thi ih America ramah a lar bik pawl Television hmuahhmuah ah  zarhkhat sung lai sunzan ti loin a thu (zuknung) lawnglawng an suah. Dollar million tampi cem in American minung million tampi in sunzan ti loin an zoh. Cutikah American khrihfa pakhat in “The glory of the slut” “Hlawhhlang nu sunlawihnak” tiah cahram pakhat a ngan. American president thih lai hnakin American mipi in an zoh tamsawn pei maw, mipi sumpai tawnsawn a cem thei men. Ziangruangah tile Taxes state ih milian bik putar pakhat a pasal ah a neih ruangah asi

Israel thuanthu kan zoh tikah Israel mipi pawlin Pahtian thu hnuai ah nung lo in an luhhlul ih Pathian hriakthih hruaitu an dodal can a rak um. Anmah hruaitu Moses cu Pathian hmaiah a um lai ah, mipi pawlin Pathian nung be loin an tuahcawp caw lem an bia ih mipi an lam rero can a rak um. Pathian hriakthih David cu hramlakah thih tih in a tlan ih lungpuk sungah a relh can a um. Pathian hnawntak, siangpahrang Saul in Israel ralkap pawl thawn Pathian hriakthih David cu thah tumin raal dawi vekin an dawi rero can a um. Amah hringtu pa dodal tahratin lalnak a cuh ih Israel siangpahrang tohkham ah Absolom a to can a rak um. Israel ramah Ahab siangpahrang a lal ih Pathian kamsang diktak pawl cu that tahratin Baal betu kamsang lem pawl cawimawinak pek can a rak um. Kamsang diktak Elijah riangri lungpuk sungah a rak relhcan a um. Kawhhran thuanthu kan zoh asile “buhlem” in “buhtak” a khuh theh can a rak umih “dark ages” “thimcan” tiah thuanthu a herliam can a rak um. 

Babylon ram kan zoh asile Pathian in a tluse mi Israel pawl hremtu ah hmanrua ah a hmangih duh aw emem in Israel pawl cu sal ah kai tahratin a hrem can, Jerusalem biak inn pi le a kulh pawl a rak siatsuah can a rak um. Cuvek thotho in Babylon cu ziangtik hmanah dingtho sal nawn lo dingin siatsuah can a rak um.


Insang thuanthu kan zoh asile Jacob insang ah iksiknak, huat awknak a rak um tikah Joseph cu a unau pawlin an zuar ih Joseph unau pawl duhthusam a kimcan, Jacob le Joseph  mithli tlak can a rak um. Cuvek thotho in Joseph unau pawl cu ningzak phurpi khat in an lung kekkuai in Joseph hmaiah an kun ih Joseph le Jacob cu lungawi mithli thawn an khah can a rak um. 

Aboslom le David te pafa lakah Absolom cu mipi tamsawn in an duh ih an siangpahrangah an pom ih David cu a fapa tih ah thih tih in a tlan rero can a rak um. Cuvek thotho in Absolom le ho pawl thahthluh can le David cu a siangpahrang inn ah a kirsal can a rak um.

Bulpak nunah zoh asile David siangpahrang cu raalthiam hminthang tiah cawisan a rak hlawh can a um vekin siangpahrang a tuanih amai raalbawi pa cu that tahratin a nupi a uiretpi ih sualnak cu thinlung diriam zetin a rak cen can a um. Rei lote ah amai sualman tuar harfualfo tuar in amai fapa in mualphoza in a tuah can, siangpahrang tohkham tlansan in thih tih ah a tlan rero can a rak um. Samson in Filistin raalkap tampi a thah can a um vekin Dalilah kawngpi parah hnangam le diriam zetin a ihthat can a rak um. Cutin an mit mithhnih an porhsak ih hniksuak sainak ah Falistin pawlin an hmancan a rak um. 

Gehazi in thuphan per tahratin raalbawi Naaman hnen ihsin a ngah mi cu lungawi zetin a tangsungah a pomcan a um vekin a duhlo bik mi pharnat in a tlakih thihhngakin a tahcan a rak um. 

A tlunah simmi pawl hi tahtthimnak vekin simmi asi. Milai thuanthu zoh tikah bulpak, insang, khua, ram, miphun khalin thuanthu herliam can an nei. Can tampi cu diklonak, thuphan, tisa thinlung diriamternak le sualnak in milai thinlung a luahkhat can, a ukcan a umih mipi in kamsanglem an cawisan can, siangpahrang le uktu mitha loin ram an uk can, diklonak in ngah mi in milai thinlung di a riamter can, Pathian lem an biak can, miding le mifel cu namthlak an tuar can, dingfelnak in milai thinlung sungah cawisan a hlawh lo can, cutivekin milai san thuanthu a her aw mi thuanthu in in sim. 

Laimi thuanthu kan zoh asile uk awknak lam thu ah kan pu le kan pa pawlih rualpitha le unau a sidah lomi pawlin kan pupa ram kan ram cu an uk. Lai nunphung a siattheh zo. Khrihfa dingfelnak in milai thinlung a uk nawn lo. Biaknak lam zoh asile duhdawtnak Pathian betu pawl thenthek awknak can asi. Leitlun pumpi milai thuanthu kan zoh asile Pathian umlo milai nun (godless society) lamzin parah a feh rero lai asi. Ziangvek dinhmun, zovek milai thawn, khui tawk ramah, ziang hnatuan tuan in, ziangvek phurrit tawn, ziangvek tuanvo, zo in ziang an lo ti, ziangvek tumtah, tlaksam mi le neihnunnak na nei khal asile a hnuai lam vek hi na 2011 kumsung can hmandan si hram sheh!

(i)

Thinlung sungah hmun a luahtu:  ruahnak, suangtuahnak, tumtahmi, duhmi, hiar mi, nuam timi, caak mi, huatmi, zumni, nunpi mi, ziangkim in PATHIAN CAWIMAWI hram seh!


(ii)

Kaa ihsin a suak/lut mi: Na kaa sungah a lut/suakmi tongkam le ei-le-in in PATHIAN CAWIMAWI hram seh!


(iii)

Na mit in na hmuh/zoh mi: Na mit in na zohmi le hmuhmi pawlin PATHIAN CAWIMAWI hram seh!


(iv)

Na hna kua sungah a lutmi: Na hna kua sungah na lutter mi tongfang, awnmawi pawl khalin PATHIAN CAWIMAWI hram seh!


(v)

Taksa ruangpi hmannak: Mitmeng le taksa cangvai in a langter mi thu, kut in ngan mi cafang, taksa in a dai mi, taksa ruangpi umnak hmun, ziangkim in PATHIAN CAWIMAWI hram seh!


(vi)

Neihmi hman awknak:  Sumsaw le thlawsuah tinkim hmannak, pawlkom le pehtlaihnak tinkim, nun ih rah in hmual a neihter mi, tikcu can hmannak, tongkam le tuahnak in a rahsuah mi, ziangkim in PATHIAN CAWIMAWI hram seh!

Leitlunin zo le ziang a cawimawi khal asile nang cun PATHIAN CAWIMAWI aw! 

Ziangah tile Pathian in Amai hmin cawimawitu dingah sersiammi na asi (Isai 43:7). 

Midang tuahmi parah Pathian in thu a lo then lo. Miphun dang pawl tuahmi parah hngat aw in Pathian in kan miphun thu a then lo. Khawdang pengdang mi pawl tuahmi parah hngat aw in Pathian in kan khua kan ram thu a then lo. Nangmah in na tuahmi par lawngah Pathian thu in a lo then ding. Kan khawsungmi pawl tuahmi parah lawngah Pathian in kan khaw thu ah thu a then ding. Pengdang mi pawlih tuah mi parah hngat aw in Pathian in kan peng le kan ram thu a then lo, kan peng le kan ram thu ah kan peng le kan ram mi pawl tuah mi parah lawngah Pathian in thu a then asi. Nang le kei nitin nun, thinlung khawruah suangtuahnak , tongkam, ei-le-in, nitin nunrah, pehtlaih le pawlkom, taksa hman awknak, thlawsuah malsawm neihmi, tikcu can hmannak ziangtinkim in PATHIAN A CAWIMAWI asi ahcun Pathian in in sersiamsan a famkim asi. Cucu milai nunah hlawhtlinnak sangbik asi. Leitlun nun ihsin a kumkhua, sankhuk in a hmun dingmi kan tuah thawk zo mi umsun asi.