KHRISTIAN NUN

By : Rev. Thang Tin Sum Jn.10:11, 1 Pet. 1:19, Rom.5:8; Tirh 2: 5-6, 46-47, 4:33-44. (A Hmun: FBCY) A Ni: May 2, 2010. Thuhmaihruai: Van Lianpai’ kan dung naite ih a thusim mi kha ka hngilh thei lo. Natnak phun 4 a timi kha…Kum 40 lenglo Pastor a ttuan sungih a hmuhtonmi a si. Tufang ah hint hi she la Laimi Khrihfabu hi seherh duahdo in a thi ding a si hiteh ka ti. Pastoral letter in kuat tluk in ka ruat ve. Rev. Hlawn Piang khal in FBA GS a ttuan lai ah Thang Tsin Mekezin ah Laimi kan remawk lo thuhla cahram a rak ngan dah. Khuahlan kan pupa san ah cun fei le nam in kan do aw. Asinan tui kan san ah cun Pawl dangdang phuan tahratin kan do aw lala a ti. Laimi Khrihfa pawl, kan zumnak khuiah kan ret? Kan pupa pawl ih duhdawtnak le zumnak khuiah a hlo ttheh? Bawi Khrih thisen cahnak ih suahpimi Khristian Nun khuiah kan ret? Kan dung baite ZBC Trienial Civuipi ih an thutlangpi khal “ Pakhat le pakhat theihthiamawknak” ti a si. Tirh. 2 sung ih an tong an thei aw thluh timi kha an sirhsan. Laimi Khriatian pawl kan theih thiamawknak le kan duhdawtawknak, kan zumnak tlangpi, kan Khristian Nun hi a hlo vivo deuh in ruat cio cu a si hmang ke. Hivek thutlangpi tla kan ret hi. Tuizing ah Bawi Khrih thisen ih Tlencia Khristian Nun, malten ruat sal ding ah ka lo sawm. Khristian Nun kan relkhawm hlanah Jesuh Khrih ih in tlenthu, kan hrangih a nunnak a pek thu ruat hmaisak ka duh. A. Jesuh cu tlentu a si. 1. Misual kan sihrih cing in Jesuh kan hrangah a thi. Rom. 5:8 2. ..Tuu hrangih a nunnak a pe siangtu ka si. John. 10:11 3.Kan luatnak Jesuh Thisen a si. 1Pet. 1:18 Kan nunnak in tlensuak tu cu sui le ngun a si lo. Jesuh Khrih ih thisen a si. .. Khrih cu soiselnak um lo raitluan tuufa bangtuk a si.. a ti. Himi zawn ah raitluan timi tongfang a hmang. Raitlaun timi cu Khawvel pawl rak si dah pawl cun an thei ding nan, tulai mino pawl cun nan thei lamlam lo ding. Rai thawi tikah raitlaun a si maw si lo timi hi a thupi zet. An dilmi ttilva hi a menmen a si lo. Thuthimnak ah, Se dum thlemthlem tla an dil thei. Sedum an dil nan, Semei par tivek an pek pang le an thin a heng. An duh lo. Rai a tluan lo an ti. Jesuh cu raitluan tuufa a si. 1 Pet. 1 :19. B.Khristian Nun 1.Khrih thisen in pumkhat a can ter. Eph. 2:13 Judah le Zentail karlak ih a phentu phar pawl a bal ttheh. Bawi Khrih thihnak in miphun 2 cu phun 1 ah a can ter. Pathian hnen ah a hruai. Zumtu dang pawl thawn hmunkhat ah Bawipai Biakinn thiang ah a um ter. Pathian ih um duhnak inn ih sak cihmi kan si. Eph. 2:19-22 2. Unau vekin an nung Tirh; 2:40-47, 4:33-34 sungkhal ah Bawi Khrih thisen ih tlencia Khristian pawl ih nundan fiangten kan hmu thei. An neihmi thilri an tawm aw. An khawm tlang. Pathian an thangtthat. Midang pawl ih mithmai ttha an hmu. An pawl sung ih lut hiar a um nasa. Cuiruangah an lut cupco. Ps. 133: Pathian unau pawl hmunkhat ih umtlang cu an nawmnak bik a si. Unau vek in kan va um thei ngai lo ve. Kan tthen awk zia hi a mak!.. Khristian cang hrih lo cu siseh la, Khristian ka can theinak lam zin a um lo men ding. Gandhi ih tong… Thisen in in va neh thei lo lawman ha ka ti ttheu. Kan ttong kan ziaza hi kan va Khrisntain lo law man ha? Kiangkap ih dawt ding cu sim hlah. Fih kan nung. Kan tazacuai awk liangluang ka ruah ah ningzak tuk kan si. Thisen cahnak khui ah kan hlo ter. Kan pian tharnak khuiah a hlo? 3. Thuthangttha nasazet in an phuan Thisen ih tlencia mi Dungthluntu pawl in Bawi Jesuh ih thawhsalnak thuthangttha cu phuanglo in an um thei lo. Nasazet in an phuang ih Pathian in thlawsuahnak tampi a pek. Zo hman mi tlasam an um lo.. ti a si kha…. Tirh. 4:33-34. Cui Pathian hna, a thuthangtha phuan cu an dai thlang lo. Bawipai hna ttuan cu a lak a si dah lo tikhal an fiang.  1. Kor. 15:58. Kei tla Wanted timi Bawi Jesuh thuhla ca zem ding ngan in,, Pathian thuthang ttha ka rak phuan hnelhno mi hi a lak a si lo ti ka fiang deuhdeuh. ..”Wanted”…1972 Thil le ri ka nei ka tinak a si lo. Inn le lo tthattha ka nei ka tinak a si lo.. ka nei lo nan, ka tlasam dah lo ding..Ka thlarau a tlasam lo… Tirh. 4: 44. Ka dil lo mi pipi Pathian in I thlak rero men. A felnak hawl hmaisa uh a timi hi ka hrangah a dik a si mei.. Mtt. 6: 33. 4.A thisen ruangah dingnak 1 Pet.2:24-25 ….Khrih in amah ih taksa rori in kan sualnak cu thinglamtah ah a thlenpi zo ruangah kannih cu sualnak ahcun mithi kan si ih dingnak sungah a nung ding mi kan si Amah ih hma ruangah damnak nan ngah zo… timi Bible ih in zirhmi hi thuk deuh in ruat cio u si. Sual ngaihthiamnak thu cu nasazet in kan uar ih dingnak thu hi kan uar tuk ttheu lo. Cucu Laimi kan Khrihfa nun ih kan tlaksamnak bik pakhat a si zo. Tubaite ah Piangte in Chin Khriatian le Moral timi ca a ngan. Van Lian pa ih kan natnak phun 4 a timi sung ih thuphan kan per tuk a timi kha si lala. Kan pupa le rannung thisen cahnak. Rannung thisen lawng zumtu kan pupa pawl an nunak zoh tikah uar tlak an si. An zumhnak ih a suahpi mi cu;; -Dingfelnak -Rinsantlak sinak a si. Hithu hi vei tamtuk ka sim zo. Ca khal tampi ka ngan zo. Asinan ka sim sal thotho ding. Kan theih cio vek in kan Amblem cu; Vakok, Vapual a si.. Vapual ih sullam cu rinsantlak tinak a si. Kan pupa pawl cu rinsantlak an rak si taktaki. Mirang uk san in Mahsahlah tiang, kan ramah kan pupa pawl cu, rinsantlak an rak si. Ramsa thisen in cu vekin rinsantlak an can ter ah cun, ziang ruangah, Jesuh thisen in cahnak, rinsantlak kan si thei lo timi hi ruat tlak ngaingai a si. Napin ruat cio hnik uh. Ka pai’ sim ttheu mi ka hngilh thei dah lo. Ka hna thlam ah a cuang ringring… Pathian tong ngai mawh lo in.. a ti ttheu. Pathian hmin sal in an tong ringring. Tong sual ding an ttih tuk. Tuisan ah cun kan duhduh in kan tong hluahhlo men. Zohman kan hmai sawng lo. Kan ttih lo.. Thulakkhawm; Tlencia Khristian nun timi cu; 1. Khrih kan ai awh ah a thi ti an fiang. 2. Cuui thisen in miphun pakhat ah a can ter. 3. Unau vek in an nung hliarhlo. 4. Midang pawl ih mithmaittha anngah. 5. Thisen cu kan damnak lawng si ter lo in kan dingfelnak khal a si an thei. 6. Pathian hnattuan a thutthangttha phuan cu a lak a si lo zia an thei fiang. Thuthimnak in ka tong ka net ter ding. A kum cu 1984 hrawng a si. A hmun cu Mon ram Kya insik Myone, Tagay timi khawte ah a si. Capt. Thang Lung ( Suisui pa) a thleng. Rinlopin Lai pacing 2 a tong. Mon inn ah an um. Japan ral lai ah Japan pawl in thah an tum ih, Mon pa in an cangpawl ruk beng inn ah a thuh. Japan pawl in ur an tum nan, Mon pa in a siang lo. Cule Japan pawl in Mon pa cu an kah that ih an tlan. Laimi ralkap pahnih cu an hung suak. Mon tei innsung sang hrang ah ziabng ka tuah le a ttha ding tiah an pol. An meithla an ret ih, Mon tei inn ah an um. An hna an ttuan sak.Riantu ah an cang. An hrang ih nunnak liamtu Mon pa cu a hngilh hrimhrim lo. An mah ren cu har an ti lo. An pum an pe aw thei mei a si cu. Kan Bawipa in Kalvary tlang ah kan hrang ah thisen thlet in a nunnak in pek. A thi ih a tho sal. Kan hrangah a si. Cumi a fiangtu [pawl in a hrang ih nun cu har an ti lo. Kan hrang ih a nunnak a liam mi hi ruat sal in thazaang la cio u si. Kan ti thei tawk in rian cio u si. Kan thusim mi parah a tha pahnih khat a um le Pathian in thlawsuahnak in pek sak hram seh. Amen…