KAWHHRAN HMAISA IH KIRSALNAK ZALAMTLUAN

Bung khatnak

Pathian mi pawl khualtlawnnak zalamtluan cu Kawhhran hmaisa pawl ih comi, neihmi, nun le zalamtluan a si. Ziangah tile Kawhhran hmaisa pawl ih hrampi cu Pentecost ni ih Thlarau Thianghlim le Athiltitheinak hmual cu a si.

Lei khawvel hi ti-mualpho ih a um theinak ding ah, Thlarau Thianghlim thlipi le meisa cun dungthluntu pawl cu a Baptistma hai. Tong dang in an tong ih an thei aw theh. Thuthangtha an sim ih mi a thawng a thawng in an piangthar. Thilmak titheinak in a thlun ih tuarnak tla cun Kawhhran a sawh hnget in a ti cak sinsin.

Cuiruangah Kawhhran hmaisa pawl ih thumawknak le thuhmaihruai cu Pathian pekmi thil thar Thlarau Thianghlim thiltitheinak a si. Cuvek thotho in tuisan, caan neta ih Kawhhran le Rawngbawltu pawl ih thumawknak khal Pentecost ni ih Pathian pekmi thil thar thotho cu a si. Unau, nangteh, na Rawngbawlnak ah Pentecost ni ih Thlarau in voi-khat tal a lo tham maw?

Cule Kawhhran hmaisa ih ringtu pawl cu, rawngbawltu, Cross ralkap tha le Khrih thu theihpitu an si. Kawhhran hruang sung ih Mission vei duahdonak le thianghlimnak a luh cun an hmabak cu Kawhhran thang cak le harhdam a si.

Kawhhran hmaisa pawl san ah cun, ziangtiklai khalah Thuthangtha phuangdarh le Mission tuan dingin forfialhnak le sawmawknak an nei dah lo. An nun ih a um cia ruangah sawmnak aw theih a tul lo. Tui’ san ih “ Mission Thuthangtha phuandarh hna” kan ti zekzeknak cu kan nun ih a um lo ruangah Mission kan ti zekzek sawn riangri.

1.    Thlarau Thianghlim Lo Cun

Dungthluntu pawl hnenah Jesuh in Thlarau Thianghlim a rung thlen lai hlan lo Jerusalem suahsan lo ding in thu a pe hai (Att 1:4). Ziangahtile Thlarau Thianghlim lo cun nun hin umzia a nei lo, Kawhhran hin umzia a nei lo, Rawngbawlnak khal hin umzia a nei thei lo ih Thiang Thlarau tellonak poh poh cu sual a si. Thiang Thlarau thawng lawng lawng in a si!

Dungthluntu pawl san ahcun Thlarau Thianghlim cu hngak dingin thu a pe. Asinan tu-ah cun dil le hngah a tul nawn lo, kan pianthar leveten kan sungah a um cih-hngal. Asinan a thiltitheinak huham lole cangvai ding cun kan dil le kan sawm a tul a si. Aw! Thiang Thlarau cangvai aw! In sem alh aw! In thangphawk aw!

Africa ram ih Evangelist pakhat cun, “ Pathian thiltitheinak thawi kan khah hlan ahcun thu kan sim dah lo, Thiang Thlarau cahnak thaw lawng in thu kan sim. Cuticun tipithuanthum ngapi in raw lei ding a hawl ih a pan bangin mi in Jesuh an pan theu” a ti. Thiang Thlarau sawm uhsi, kan inn-sungsang a dam ding, kan Kawhhran a dam ding, kan ram a dam ve ding.

Jems A.Stewart in “ Mipi hip thei lo le an thinlung tin at ka phan luat tuk ruangah ka ralthatnak ka hloh ih, Pulpit mit-tlainak le hna-tlainak in a luahkhat thluh thlang a si hi” a ti. A sim bet hrihmi cu, “ Pathian mi-hman le thawsuah dawn an duh a si ahcun, Thlarau Thianghlim khaisang aw” a ti theu. Ziangkim ah Thlarau Thianghlim lawng lawng si kumkhua hram seh.

Mi hipnak ding ih thilmak mangbangza tuah thei ta rori tum, hna-tlainak le mit-tlainak ta rori kan hawl rero hi thangphawknak lem an an si tin Zawlnei/Prophet Isaiah cun a rak ti. Hivek menmen ah buai nawn lo in an thlarau hrang Rawngbawlnak nung din a cu tuk zo! Aw! Thlarau Thianghlim in hip aw! A tak Rawngbawlnak nung din sak aw!

2.    Thlarau Thianghlim Le A Hnatuan

Thuthlung Hlun ahcun, Pathian Thlarau cu Prophet/Zawlnei pawl hen lawng ah a tong in a rak um asinan, Thuthlung Thar vethung ahcun mi hmuah hmuah (zumtu mi piangthar zate) hnenah a um. Cuiruangah zawlnei/Prophet dang kan tul nawn lo, zumtu kan zate hnenah Bawipa cu a um in a tong rero a si. Amen...Haleluijah. Tu-nah Bawipai’ aw na theih a si le hlanlai Zawlnei/Prophet pawl bang in raltha zet in au aw, na aw kha suah tuarto aw Tawtawrawt aw bang. Cutluk nun ropi le mankhung neitu ah Bawipan’ in tuah zo. Pathian Hmin thangthat in um sin ko seh.

Thuthlung Hlun ahcun Pathian in “A Aw” hmangin mi a ko theu ih Thuthlung Thar ahcun, ‘Aw’ mai si lo “ Athisen le A Thlarau” hmang ih kawhmi kan si. Thuhlung Hlun ahcun khawdur, nimthlakau, meisa le ling-hnin tivekin hmang in thu a sim ih, Thuthlung Thar vethung ahcun kan mah Zumtu lo cu hman ding dang a nein awn lo. Haleluijah... Unau,  Bawipan’ hman a lo duh!

Thlarau Thianghlim hnatuannak ahcun, “An sual Fei ih sun vekih na in an thei aw aw”. Thlarau Thianghlim in hna a tuannak ih piangah sual Fei ih sun vekih na ti duahdonak a um theu. Doctor pakhat in mina  a bese zet cing in, na dam tuamhlawm na tul lo ti bangta sehla, Doctor santlailo a si ding. Thlarau Thianghlim in han a tuan tikah kan sinak tak le kan tulnak vekvek in han a tuan theu. Na zet khalsehla Thlarau lam malsawm thar kan dawn theinak ding ah a si. Leitlun Sibawi pawl cun damnak sii an nein an nunnak si cu an nei lo. Jesuh cun kan nat lai ah damnak sii, kan thih lai ah nunnak sii, kan tuar lai ah tuarnak phen ih malsawm a nei.Haleluijah.

Cuiruangah Thlarau Thianghlim in akn sungih hna a tuan taktak cun sual ih sual zia, tenum zia, bawrhhlawh zia le thil tha ih that zia, sunlawi zia le man neih zia in hmuh fiangter. Sualnak kan tuah betmi um cuangsillo khalin misual kan si zia theihawk sinsinnak tla in neither. Cu mi ruangah midang hmuhah a mawilo timen sin awn lovin, Pathian sunlawinak hrangih sual tlansan duhnak taktak kan nei thlang. Cui Thlarau Thianghlim thiltitheinak cun sual hnenah “ Ka tlansan ding,” titheinak le thil tha hnenah “ ka lo tuah ding” titheinak in pe (Ef 1: 17-20). Amen.

3.    Thlarau Thianghlim Mei-alh Hluah-hlo

Thlarau Thianghlim  thlipi, mei-alh le tek-tla vekih leitlun tilinglet thluh thei cun dungthluntu pawl cu a tidanglam hmasa ih, rawngbawlnak alh-hluahhlo thawi nun taktak ih Thuthangtha an hun phuansuahnak cun, mipi nun cu a ti danglam in a kek-kuai ter theh a si kha. Pathian mihman pakhat cun, “ Nangmah na danglam hmaisat ta lawng ah, na sim mi an danglam ve ding” a rak ti dah. Aw! Ka Rawngbawlpi duhtak Thlarau Thianghlim in a lo tham maw? A lo tidanglam dah maw?

Cuiruangah Apostol san, Kawhhran hmaisa caan, vanglai tak cu kum 23 a daih, a ne-nawi tiang cun kum 53 sung a daih. Cui sung te ah Khawmualpi (Continent) pa-thum an ti-linglet man.  Dr. Graham Seroggie cun, “ tui-san Kawhhran hi Kawhhran hmaisa san vek in cak ve nungla cu kan leilungpi hin Thuthangtha voi 50 a thei bet sek sek zo ding” a ti. A sim bet hrihmi cu, “ Tuisan ih mi piangthar pawl ih tah-hla ding cu Kawhhran hmaisa ah in kirter aw” ti hi siseh la a ti.

Pathian mihman pakhat cun, “ Mi piangthar pakhat in thlarau-hlo 20 kai ding in, mi piangthar 200 in kum ruk ah mi-hlo 12, 800, 000, 000 kan kai thei ding a si” a ti. Cu ti a si ahcun kan leilungtlun pumpi ah mi 6, 000, 000, 000 kan rak um si bangta sehla, Thalrau Thianghlim thiltitheinak thaw cun leitlun ti-linglet hi a v arak har awm lo em! Kum 1000 lenglo kan hnatuannak hnakin annih ih kum 23 tuanmi ah anni tuanmi a tam sawn! A san cu mi piangthar zate hin mitin hrang damnak Thuthangtha phuansuah kan uar lo ruangah ti a lang fiang tuk ko lo maw!

“ Aw! Mi 200 tal mi piangthar, Thlarau Thianghlim ih thammi kan um lo maw si?”

Cuiruangah Thuthangtha phuan-darh cu Kawhhran din san a si. Kawhhran ih tumtahmi cu Thuthangtha phuang-darh/thehdarh ding ih Kawh khawm tinak a si. Billy Graham cun, “ America ram ih Thuthangtha phuan-darh Rawngbawl hna 80% cu Locak Church tuannak rahsuah a si” a ti.

Thuthlung Thar Kawhhran cun theipatawp suahin Thuthangtha thehdarh hna ah le Pathian hrangih mihratkhawkheng ah an nun neihsunte cu an sungbung aw theh a si.

4.    Kawhhran Hmaisa Le Tu-lai Kawhhran

Pathian mi hman pakhat  cun, “ Kawhhran hmaisa cu ziangtluk in so an duhdawt awk, ti a siih, Tulai Kawhhran cu ziangtluk in so an hruat awk, ti a si” a ti. A sim bet hrihmi cu, “ Setan khal in a neh thei lo dingmi khawkulh pi Kawhhran cu mah le mah do aw in kan thekdarh theh a si hi” tin a rak sim dah.

Pa-khatnak: Setan ih neh theilomi khawkulh a si:

Kawhhran hmaisa, Apostol pawl ih “ cangvaihnak le Thuthangtha phuan darhnak” Cabu cu “ Pathian ih thawt-khum mi ro-sunglawi cabu a si. Cutawk ahcun thuhlawm pa-ruk kan hmu ih pa-nga cu then aw thei dahlo catuan hawlhtlang ih cangvai tlang ringring an siih, pa-khat lawngte cun lei sancem hlan sung cu cawl lo bang lo in a do ringring vethung, a sinan a do neh thei taktak dah lo. Cu pawl cu; Pathian thawt-khum, Thlarau ih khahnak, Thlarau Thianghlim cangvaihnak, Thuthangtha alh-hluahhlo ih phuan-darhnak pawl tla an si. Tuisun ih zumtu pawl hi kan ti a hal theilonak dingah, Setan cun “ Thuthangtha lem lole thangphawknak lem” hmang in in bum rero cu a si hi.

Pa-hnihnak: Mithi khawkulh le Hell-ram khal ih neh thei lomi a si: 

Kawhhran hmaisa pawl cu Pathian pekmi thilthar thawi an khah ruangah an hrang lungawinak Lal lukhum le thawhsalnak thasawn cu ruahsan in, hmuhsuam nautatnak, vuak le velhnak, buainak sumpi le thihnak sumzing luihlo lak khalah, “ Kan hmuh le kan theihmi thu hi sim lo le rel lo in kan um thei lo a si” an ti vulvo mai a si kha. An hrem poh a sile an cak deuhdeuh “ Leitlun cawk buaitu pawl” tin an ko riangri (Att 17:6). Unau, nangteh, “ leitlun ti-buaitu zumtu maw nasi, leitlun in a ti buai zumtu so na si?”

D.L. Mody in hitin a rak sim dah, “ London khawpi ah ka Kawhhran Upa a thi ih thaisun nahzi 10 AM ah keimai phun ding a si. Mi hmin thang pakhat a si ruangah mipi le an tam zik nasa si, Jesuh ih mithi Sermon rori ka Sermon ding tin zan sim hnu tiang ka timlam ciamco. Maktak cu Jesuh in mithi Sermon a rak nei lo nunnak Semon lawng a nei”  tin a rak sim dah. A va sunglawi ve, Jesuh cun kan kan tah lai ah lungawinak mit-thli Sermon a nei, kan tuar lai ah tuarnak phen ih malsawm Semon a nei, kan nat lai ahdamnak  Sermon a nei, kan thih lai ah nunnak, thawhsalnak Sermon a nei..Haleluijah...Amen.

Pa-thumnak: Thlarau Thianghlim lawng mi-hipnak ah an hmang:

# James A.Stewart cun, “Thlarau-hlo kaih lo ka phan lutuknak ah Thuthangtha hi a huauhuau zawng le a nuam zawng hlir in ka fehpi ih, kan khawm nawm vek le kan thawm nat vekin, Nun mu-ril lam ihsin mit-thli tlaknak a um nawn lo” a ti. Hitin a rel bet, “ Kan Rawngbawlnak ih piangthar pawl in, Jesuh sunloihnak cang thiam an mal tuk. A san cu, kan rawngbawlnak ahhin Bible thutak ih kaihhruai awk hnaikin hlim-hlawp lam kan uar ruangah a si. Bible thutak zirhawknak le thlacam nun nei dingih zirhawknak sawnah sawm ding kan si” a ti. James A.Stewart thotho cun, “ Tulai rawngbawltu pawl cun Mipi tam lam hi hlawhtling tahnak ah kan hmang ih, awn thei thilri le hla in mipi hip kan tum theu hi Thlarau Thianghlim riah kan seter” a ti. Kawhhran hmaisa thawn kan va dang em! Kawhhran hmaisa cun Jesuh le Thlarau Thianghlim lawng mi-hipnak ah an hmang. Mi-hipnak ih thildang kan hmang a si ahcun sual a si. Foreign ih ra le mi-lar, milian, mifim, hmeltha, cathiam kan si ruangih mi hip kan si ahcun “ A lem rawngbawlnak, thangphawknak” a si. Hi vek hmang ih mipi lak ih thangphawknak kan hawl a si ahcun Bawipai’ hnenah ngaidam dil lohli uh si.

Watch Man Nee khalin, “ Bible thutak zirh awk ai-in hlasak nawm ta rori kan zirh awk hi ralrin a tul” a ti.

Richard Baxtercun, “ Tu hi ka thusim neta bik ti thinlung pu in, mithi zikte in midang mithi zikte hnen ih roc ah vekin taknak le nun hmuahhmuah thawn thu kan sim” a ti.

Pa-linak: Anmah an tumsuk vivo ih Jesuh a sunglawi vivo:

John the Baptist in “kei cu tumsuk vivo ding Jesuh cu thang vivo ding” a ti vekin a sipnak ih piangah Jesuh a feh vivo, a lu an tannak ah Rawngbawl a thawk ih Jesuh a sunglawi. Anih cun Jesuh mi a pe ih a mah cu a tumsuk vivo cutin Jesuh a sunglawi vivo (Jn 3:30). John the Baptist kan va tul em! sawm uh si.

James A.Stewart cun, “ Tui sun ih kan catar le thuthangca ih kan hmuhmi hi milar miropi kan sawm tihi a tam theu. Cu pawl cun Jesuh a phen theh. Tahthimnak ah hlasak thiam cumi khami tile thusim thiam ti zawng ih tlang than awkter tla hin Jesuh a phen ih, hruaitu in kan sim than dan ih zir in mipi in rawngbawltu hmuh an tum ve. Kan than dan a dik lo a si ahcun, mipi in thilmak hmuh simaw, hlasak thiam hmuh simaw, an tum ih Jesuh kan phen thluh” a ti. A sim betmi cu, “ Tulai rawngbawltu le hlasak thiam hrekkhat hi cu Jesuh ai-in kan sunglawi sawn ih Pathian in sunlawinak a co banlo a si hi” a ti.

Veikhat cu Revival Speaker langsar tak D.L Moody ih piantharnak pa, Moorehouse in America khua pakhat ah Crusade a nei ih, America le English hmuntin ah a mah hmang in thangphawnknak a thlen lai tak a si. Hmanseh cui tum ahcun Thlarau Thianghlim a cangvai lo, a mangbang in sunzan thla a cam ih a danglam thei cuang lo. Zing khat cu mangbang tawpkhawk tingaihnak thei loin, zin tluan ah a vak ih, “ English thusimtu ropi bik Harry Moorehouse in thu a sim ding” ti catar hmu. Cu veten Committee pawl hnenah, nan catar la thla zang uh Thlarau Thianghlim a dawnkham” a ti. Cui hnuah thangphawknak maksak a thleng a si kha. Thlarau Thianghlim lawng sunglawi seh. Jesuh lawng sunglawi seh.

Pa-nganak: Bawipai hnen ih an donmi lawng mi an pe:

Peter, James le John hite pa-thum pawl nun thuthup cu, “ Thilmal tuah theinak an nei, asinan an tuah dah lo. Hmel danglamnak tlang ih an thil hmuhmi kha an sim dah lo”. An lak ih tel ve dahlotu Matthai, Mark le Luk pawl riangri in an sim (Matt 17: 1-3). Paul khalin Van-thumnak ih laksoh a si thu kha midang vek in a sim (2Kor 12: 1-4).

 Ziangruangahtile Pathian mi pawl cun “ Bawipai’ hnen ih an donmi lawng mi an pe theu, Bawipai sianmi le sim ding a timi lawng an sim in an phuang theu” Amen.

Apostel san, Zumtu hmaisa pawl cun;

Duhmi dang an nei lo Bawipa lawng an duh!

Tihmi dang an nei lo Pathian lawng an tih!

Huatmi dang an nei lo sual lawng an hua!

Veimi dang an neilo thlarau-hlo lawng an vei!

Kawhhran hmaisa ah kirsal uh si!

Bawipai' Sabit hmuan sung in,


Pastor-Evan Lai Lian Thang