“A kuai thei lo mi RO BAWM”

Tuizing ih thuthangtha in hlawmtu hi S. Lal Tan Ngai a si.

Thuthangtha ah lut uhsi.

Thupi:   “A kuai thei lo mi RO BAWM”

Mathai 6: 19-20

Pathian in Israel mi pawlih an thlun ding mi dan cu Sinai tlang parah Mosia hnenah a pe. Kan Bawi Jesu khal tlangparah a kai ih A mah thluntupawl hnenah cun Pathianin ziang vekih nung dingin a duh ti mi a zir ter.

Cang 19

Jesu in leitlunih ro khawl khawm lo dingin a thluntupawl hnenah a zirh. Ziang ruangah ti le…..

1. Famkimlonak hmun a si ruangah (imperfection)

Hi leilung tlunah ziangzat kan neih hmanah dirim ti a um cuang lo. Hi lei thilri hi nun lungawinak in thlen theitu ngaingai an si fawn lo, a tawpih kan thinpinnak in thlentu thil men a si ruangah Bawipa in hi lei ih ro kan khawlkhawm hi a sing hrimhrim lo.

2. A him lo( insecurity):

Hi leilung tlun hi a him lo nak hmun le kumkhua kan um nak ding a si lo. Kan u le kan nau si maw kan rinsan zetmi  kan rualpipawl tla hi nget le tlap an si men thei. Mi tampi cu an rinsanzet mi an rualpi ruangah  an neihmi pawl cemin lungngai beidawngin caan an hmang sal theu. Leitlun hi him in na thei maw? Bawipa in tlap le nget le rukru in an bauh theinak hmun cu A HIM LO a ti men lawng si lo in na ro, cu tawk hmunih khawlkhawm lo dingin a lo zirh a si.

Cang 20

Jesu in rukru le ngetih a ei thei lo nak hmun ih ro khawl dingin a zirh a si. Ziang ruangah ti le………….

1.      Famkimnak hmun a si:

Vancunguknak hmun le Bawipai’ tuallennak hmun cu a famkim in tul bet a um nawn lo . Ziangkim kan neih mi ah le kan tawnmi thil hmuah cu lungawi le diriamnak hlirin  kan khat liam ding. Lungawinak hmun a si ih diriamnak hmun a si ziangah ti le FAMKIMNAK HMUN a si ruangahsi. Curuangah si maw Bawipa’n cui hmun ih ro khawl dingin in ti nak san cu.

2.      A him mi hmun:

Rukru le misualpawl hrimhrim an len ve thei lo nak hmun cu ziangtitluk a him dingih bumawknak um lo nak ram cu zo hman huphurh an tul nawn lo. Ziang ti tluk a him ding ti cu sim thiam a si lo. Rukrutu an um lo ih ru ti mi in hmun a co lo hrimhrim ih ziangkim kumkhaw daih ih tuah mi an si theh ruangah cu tawk hmun cu a himnak hmun a si. Cuih hmunih ro khawl ve ding in Bawipa in a lo duh.

Van cung ramih rokhawl ti mi cu ziang a si pei?

Vancung ramih ro khawl ti mi cu a hlo mi thlarau vancung ramih kuat khi a si. Si le nang teh vancung ramah ro na khawl khawm zo maw ? ziangzat na khawl. Vancung ramih ro khawl dingih kawhmi, hrilmi le ti mi kan si thluh.

Ziangtin ro kan khawl khawm ding?

Na/ka tuan thei ngai pei maw?

India ram Meghalaya state Shilong kiang khasi hill ah pitar nu pakhatin Pathian hnatuan a duh a tuan thei lo a pi tar zo, peknak in rawlbawl a duh pek ding a nei fawn lo, thu a ruat ih zingtin zantin rawl a suan zawngah fangfai thamkhat ten Bawipai ram hrangah ti in a khawl ih karkhat a ti cun tam pi ah a cang. Cumi cu Pathian ram hrangah a thawh ih cuisicun a tidan cawngin tuini tiang Fang faittham a ra um ta nak a si. Tuini tiang Laimi kohhran tam pi le Mizoram lam khal hi fangfai ttham ringin Missionary tam pi an thlah a si. Nang le kei teh ziang hman  kan nei lo ngai maw? Kan sianglo deuh sawn? Bawipa in van cung ramih ro khawl ve dingin a lo ko ih a lo sawm na ti thei tawk in sim lamin maw? thlah lam in maw ti thei mi kan nei lo maw. Bawipai ram karhzainak dingin thu na ruat ve dah maw?

Tlangkawmnak

Hi lei cu famkimlonak hmun a si ih ziangzat va nei khal aw la kumkhaw hrang a tling lo. A hmun mi vangcung ramih khawl lawng khi hnangamnak a si ih cui hmunah cun nang khal ni ni khat ni ah na thleng ve leh zik si, ro khawl cia na neih lo ah cun!!! A kuai thei mi hi lei robawmah na ro khawl lo in A KUAI THEI LO MI RO BAWM  sawnah na ro khawl ve thlang aw..

 Kan zate hrangah Pathian in thlawsuahnak lo pek seh.

 Amen