MIZORAM, AIZAWL KHAW LIPI AH CCYI HOHANAK IN CHIN GOSPEL LIVE CONCERT TUAH DING

Chin Christian Youth International (CCYI) cu Pathian le Chin miphun hrang tithei tawp suahin t’anla dingih rak dinmi Pawlkom a si. Aliam ciami ah Pathian hmin sunlawinak le Chin mipi hamt’hatnak hrang hna rak tuan rero zotu a si vekin hmailam khalah Pathian thuthawn kekar vivo a tum.

A tlun ih tarlangmi tumtahnak cu India ram sungih kan Chin miphun khaw lipi pakhat a simi Aizawl ah CCYI ih t’anlaknak in CHIN GOSPEL LIVE CONCERT (CGLC) cu Furkut thla 25, 2011(August) ah tuah tum a si. Chin Concert tuahnak ding hmun cu Vanapa Hall ah a si dingih Zaan nazi 7:00 ihsin 10:00 tiang tuah a si ding.  Studio cu Zonun Recording hman tum a si. Ahleicein hih CGLC tuah pitlin theinak dingah Aizawl CCYI pawl in hmalaknak an nei rero. Tonak Cahnah (Tickets) 500 lenglo an tuah ih an khawng thluh zikte zo.

Hih CGLC tuah ding thuthang suak cu Mizo mipi ziangmawzat le Chin mipi ih thinlung a hip neh zet. Asan cu Mizo ram ah tui’ t’um hi CHIN hmin in concert tuah hmaisa bik t’um a si ding. Culawng siloin himi t’um ih hlasaktu ding pawl tla Mizo hlasak thiam le Chin hlasak thiampawl lawrkhawm an si ruangah a si.

Ahleice ih tulai hlasakthiam sawmmipawl tla cu

Chin hlasakthiam sungin

1.     Salai Solomon Menrihai

2.     Mai Far Men Par

Kan Chin hlasakthiampawl le Salai Thang Boih (Guitarist)  kan sawmmipawl cu Furkut thla 20, 2011 ah Aizawl ah an hung thleng ding.

Mizo hlasakthiam sungin

1.     Bethsy lalrinsangi

2.     Liandingpuii

3.     PBK Liankhuma pawl tla an si ding.

Mizo hlasak thiampawl in kan Chin hla amal bik pakhat ciar an sak tum.

Awnmawi lam kaitu ding pawl cu

1.     Guitarist.....Salai Thang Bawih (Tahan ihsin)

2.     Bass...........Lal Than Siama

3.     Drummer...K. L Tluanga

4.     K.B.............Jimmy pawl an si ding.

Hih Mizo le Chin hlasakthiam hminthang panga tlunah Aizawl CCYI in Mizoram ih um CCYI mipum sungin kan Chin hlasakthiam thangthar nonawnpawl cawihsuak awknak ah hmang phah in mi 6 hril betnak a nei ding.

Leitlun killi ih um Chin mipi zatein himi Aizawl ih tuahmi Chin Gospel Live Concert hi mah le umnak hmun ciau ih rak tel le zoh thei dingin mipi hrang DVD ih suah tum a si. Live Concert tuah ding a si vekin Vanapa Hall ah Zonun Recording an ceetpawl zate thawn kengin hlasakthiampawl ih hlasakmi khum cih ding a si. DVD rak zohtu in hlasakthiampawl ih an hmur phun, cangvaihdan le hla ngaimi hi a pial aw lo nasa ding. Atawi zawng cun Iron Cross pawl ih concert an tuahdan vekin a si ding. Mipi le hlasakthiampawl ih nuam zia le phur zia tla mah umnak hmun in kan rak hmu thei ciau ding.

Hih Chin Gospel Live Concert ah Pathian hmin sunlawi in kan Chin miphun thinlung le thlarau ih damnak a thlen theinak dinghrang kanmah le umnak hmun ciau in thlaza camnak thawn t’an rak la ve ciau uhsi tiah kan sawm aw bet a si.

Aizawl ih Chin Gospel Live Concert thuthawn pehpar awin cipciar deuh ih theih duhtu le pehtlai duhtu in chinyouth4christ@yahoo.com ah ca tanta theih ringring a si.

Thuthantu,

Salai DL Senling