Sunday, May 1, 2011

Ziang Tik Canah Bawipa Kan Hawl Ding?

 By Pastor J Van B Cung
Bible Canghril:: Na  no laiah a lo sersiamtu thei aw( hngilh hlah aw ). Harsatnak in a lo man hlanah le,kum le tikcu a her ih, thin nawmhnak zianghman ka nei nawn lo na ti hlanah hin.( Thusimtu  12:1)

Kawl pawl le sakhua dang pawl cun no lai le tuanthei can, hawl thei can ah heh le heh tin tuan ding, hawl ta hnuah kan upat lam, tar lamah Pathian lam pan ding, Pathian hawl ding, Pathian hrangah pum pek ih nun ding, a thu thlun ding  tin an zirh aw.  Cun  an zirh bet mi cu uumah tawngh/tong hmah, tilah sawng/song. Nun can khawsak nuamh ta, le ei le in khalah tlasam lo in um thei ta hnu lawngah Pathian kan be thei, kan rian thei ti a si.

Kan nih Bible zumtu le Pathian betu lak khalah hi zirhnak vek thinlung put nei tampi kan um lai in ka thei. Bible ih in zirhmi cu,  na len hnuah, le na upathnuah, ziang na tuah thei vak nawn loh can, tar lamah na Pathian hawl aw tin in zirh lam lam lo. Bible in zirh dan mal lai kan zoh hnik ding Ziang tik canah Pathian kan hawl ding? Pathian kan hawl ding can cu Bible cun tu rori hi a si a ti( 2 Kor.6:2)
 Hi nah tikcu can  relmi cu, san, kum, kum le can a rel.( Thusimtu 12:1)
Bawipa hawl can tha bik miangmo cu;
1. No Lai Canah Pathian naih le hawl hi a si. ( 12:1)
 No lai can le tuan tei'  piangthar le Pathian thei ngaigaitu pawl an sir aw dah lo, hlawhtlinnak khal an dawng tam ce. Thil tampi an tuah an tuan man. Thimnakah pakhatte rel sehla; D L Moody hi a kum 9 ah a piang thar ih Pathian thusim hminthng le Pathian mi hman ropi tak a si. Hlawhtlinank tam zet a nei ih Pathian hrangah thil tampi a tuah man.Tui ni tiang a rawngbawlnak hi Lei tlun huap in a cem thei hrih lo. Kei hi i sersiamtu Pathian ka theihnak a tlai,  ka piantharnak a tlai tuk. Ka kum 25 ah ka piangthar tikah sir awk ngaihnak le a um lo. Tuan ten piangthar sehla thil tampi Pathian hrangah ka tuah man zo ding nan si khawh tin ka ti au ruangro theu..  Ka rualpi hrek khat tuan tei' Pathian hawltu le piang thartu pawl tuah cun mi ropi le Bawipai hrang ah hna tampi an tuan man zo. Tuan ten an fim ih sumpai le thiltampi ah hlawhtlinnak an nei. Thufim 1:7, Pathian tih cu fimnak hrampi a si a ti mi hi Pathian thei ngah taktaktu le piangthartu cu  a fim ngah riai tinak a si mai. Pathian cu fimnak in petu le fimnak neitu a si. Tuan ten Pathian hawl awla na sir aw lo ding. Hlawhtlin zang le fim tuan na duh  a si le tuan ten Pathian hawl aw.
2 .Ziang tin Pathian kan hawl ding?
Pathian in na thinlung zaten i hawl tikah i tawng/tong ding a ti.( Jeremiah 29:13).  I ko awla ka lo sawn/ let ding. Na theih lomi thil khawruahhar le mangbangza ka lo sim ding a ti ( Jeremiah 33:3). James 4: 8 ah Pathian in i naih/pan uhla ka lo naih/ pan ve ding a ti.
 Pathian in by force/ aanaa/ a tin a hmang dah lo. Kanmah lamih duhnak le onawknak kan neih ta lo cun a ngah lo.  Pathian hawldan dik cu Amah Pathian thu ih hawl hi a si. Thlarau Thianghlim khal in Pathian thu lawng hmang in mi a bawm, mi nun a thleng ter.
3.Pathian tel lo ih reipi nun ih rahsuah mipawl;
1). Thin diremnak le lungawi hnangamnak taktak an nei lo. Nun diremnak lei tlunah a um thei lo, duh sin, neih sin, tha sin ih khat leitlun ah kan um. Jesu tel lo cun maw leitlun hi beidawnnak ih khat a si.
2). An fim taktak thei lo.
3). Sir awlo an um lo. Tlaipi ih Pathian theitu sir awlo an um lo. Ti ngaihnak le a um nawn fawn lo.
4). Hlawhtlinnak an nei mal. Zum lotu pawl teh na ti thei men. An nih khal leitlun thilah le sumpai lamah an thangso na ti thei men. An nunah buainak i khat an si, hmailam thuah an thin a bang , thih hnu hrang beisei ding le thih hnangamnak an nei lo.
5). Sersiamtu Pathian an parah a lung a awi lo.
6). Bawi pai thu thennak rapthlak an tawng/tong lai ding.
7). Thlarau lamah an mit a caw/ an hman a set.
Thu cemnetnak
Kan Bible bung cang hrilmi ih in sim duh mi cu: tuan ten/ no laiah Pathian hawl le neih/pianthar hi a tha bik thu, Leitlun le a sungih thil pawl hi zianghman an si lo zia ( an ziam cing ding, a mawinak thawn hloral rero, an kang thluh lai ding I Kor. 7: 31, 2 Pet. 3:10) in sim ih Pathian naih ding in zirh. Pathian tel lo ih nun a tih nun zia le a rahsuah pawl tla in sim. Pathian thei ih Amah thawn nuntlang ding in sawm. Thil dang hnak in Pathian thupit ter in nasa tak in in zirh sal.
Kan tlai ding in phansak zet.A tu le tuanten tuahsuak ding in sim. Thihnak, harsatnak le buainak,tuan thei nawn lo can in in nen/cimbaui hlanah tuahsuak ding le nunpi ding in zirh bet. Duhdawtmi unau na din hmun ziang vek a si? Pathian naihtu le neitu na si maw? Bei dawng , duhamnak i khat,leitlun thil pawl ih nehciah tuk mi le hlawhsamnak i khat nun thawi nungtu na si pang maw? Hi thu pawl hi tha ten ruat sal aw.
----------
Thubet : :Pastor James Van Biak Cung hi Emmanuel Christian Church( Battle Creek ) USA ih Pastor tuan rero laitu a si.
EEC thutawi: : 2003 ih dinmi a si. Laimi citin an kim. Falam ( Chin) tawng/tong hman a si. Minung 40 tluk si lai khalah kawlram Kawlpawl lakah missinary tampi an thlah thei.Bible tlawngta an cawm bet.Tu cu member 80 luan lai an si thlang. Kawlram sung a hleice in, Shan ram,  Igyawadi peng le Yangon peng sung pawlah thlarau hlo kaitu le an kaih ngahmi cawm vivo tu dingah missionary 7an thlah ih mission hna an tuan.
Emmanuel Christian Church hin missionay 7 le Evangelist pakhat,Lal Hre Luai ( Evan. Hrete) an thlah. Tu baite ah member sung ihsin paisa zul khawm aw in Biak inn mawi emem an lei bet lai. Miram ( USA) ah mai tawng/tong te le mai biak inn ah Pathian an baik thei zo. Hi kawhhran member pawl hi pawl dangdang ih ra um khawm an si. Nang cu tin na zum, kei cun tin ka zum tin zo hman an ti aw dah lo.Hi kawhhran ih zumtu pawl hi mifim le thiltithei  ciamco an um lo, an pastor thawk ihsin  mi tawntai tete an siih,hnatuannak tha taktak ih tuantu  an um lem lo nan thlarua hlo kaihnakah heh le heh tin tan an lak tlang. Hi vek hi cawn awk dingmi le cawn tlak khal a si in ka thei. In cawng ve hnik uh, hi Pathian ram kauhnak le thlarau hlo kaihnak hnatuan sunglawi hi. Lungawi.
Caankaitu
Chin Internet Worship

No comments:

Post a Comment

Post a Comment