THUPEK ROPI IH HMUITINMI LE CHIN RAM KHRISTIAN- VIII

"GOD IS GOOD all the time"

                                                        Pastor   Henry vl HmangaihPehzommi:
ZIANGTIN DUNGTHLUNTU PAWL KAN THAWK THEI DING?

Kawhhran pakhat hnu pakhat kan tidan le hmuh dan tla abang aw lo thei nan, kan ram ih kawhhran tthang lian le cak ding cun mah le kawhhran in ttha le rem kan ti dan cio hmang in dungthluntu sinak  pawl(discipleship group) cu kan thawk cio a ttul. Tthimnak ah hitin rawn tarlang sehla,

(1)  Pastor in zirhtu saya a nei ding ( mentor)

  Zovek minung khal tlu thei lo khawp ih cak kan um lo. Ziangtluk pacak khal siseh, a fehdan a ralrin lolen cu banhla bilh pal sual pang hman in “ pu tup” tin a thal ulh i thei. Cuvek thotho in thlarau lam ih ke kan karnak khalah ral ring tei ke kan kar lo ah cun kan rin lo pin kan tlu thutthi thei fawn. Nun kan thiam thei nak dingah pastor kan si khal len mah saya lole rualpi ttha, kan thinlung , innsang, rawngbawlnak le vision tiang tlang takih kan simtlang ngamnak ding minung- saya dang maw, kan rualpi ttha maw, kan nu le pa maw—in khaaltu ding kan ttul a si. Cuvek kan neih lo len pastor si cing le rawngbawltu si cing khal in tluuk a theih a si. Pathian le keimai karlak a fel takah ti men a ngah lo. Ngalpaak tlan ih khristian nun hi tlan kel a si lo. Khristian nun cu pehzawmawknak ( relationship) thawi a tthanglian ding mi kan si.  Pathian le nangmah karlak a fel bangin, na minung pi thawn na pehtlaihawknak le na innsang thawi nan pehzawmawknak khal a fel a ttul a si.  Cumi ti ding cun pastor tangdawr le hnuaidawr thei kan ttul. Pastor tin le saya tin in thlakhat ah vawi khat tal amai saya (mentor) thawn nahzi pakhat lole pahnih tal tlang takin Pathian thu, a mai rawngbawlnak thu, a vision le innsang thu, thlacamnak thawn a zohkirsaknak in can a hman a ttul. Cuti kan ti thei tikah thlarau lam khalah kan tthang lian sin ding.

(2). Pastor in dungthlutu pawl (discipleship group) a nei ding

Pastor in dungthluntu pawl a nei ding. Cumi ih a ttha ka tibik mi cu , amai kawhhran ih kawhhran upa pawl hmuahhmuah kha pastor ih dungthluntu pawl ( discipleship group) lole pawl fate ( small group) ah an um ding asi. Cutin, zarhtin te pelh loin vawi khat tal cu nahzi pakhat lole pahnih sung hrawng tal cu Pathian thu ruahtlangnak, simawknak, kawhhran thuhla duannak le thlacam sakawk tawnnak in can an hmang ding a si. Pastor lawnglawng in hruai loin a ha ha ten lole a remcan dan in a thlak thleng tla in hruai aw sela, cutin zarhtin Pathian in mai innsang le pumpak ih lam in hruai tlannak tla ruahaw tawn in cutin zarhtin pelh lo ih Pathian thu kan ruahawk, kan vision kan hlawm awk le thla kan cam khawm a si ah cun tu hnakin cu kan kawhhran le member a hning tengteng ding ti cu hmuh a theih a si. Kan nih harsatnak tawn can le meeting lawngah kan tawn awk ttheu tikah, thukam el aw ding le harsat thu lawnglawng rel cun cahnak mi a thlen thei lo pi! Cuti siloin thlarau lam le taksa lam ih nelawknak , hruaiawknak hnget khoh kan neih thei asilen kan khawhhran  in cahnak nasa tak a neih phah ding.

(3) Kawhhran upa pawl in anmai dungthluntu pawl a hranten an nei ve ding

Zarhtin pastor thawn kawhhran upa pawl kha an tawn awk hleiah, kawhhran upa pawl in pastor hruainak ih an ruahkhawm mi siseh, an mai seherh zawng Pathian thu sim ding in anmah ten a hranin dungthluntupawl an nei ding a si. Cun, mipum tam lam hi pawl khat ah a tambik 12 lanlo sehla. Kawhhran ih ttha le remti dan in pawl tthen theih a si. Hrekkhat kawhhran ah cun  mipa a hran ten, nunau a hranten, cun nupa tuakthar pawl a hranten, nauhak deuh pawl a hran ten tivekin an tthen . Cumi cu mai tualsung kawhhran thuthu siseh la. Hi pawl khal hin zarhtin ten vawikhat nahzi 1-2 sung tiang hrawng in pakhat khat ah Pathian thu zirtlangnak, testimony ruahawknak, thlacam sakawk tawnnak le Pathian thu ih pitling sin ding ih zirhawknak an nei tengteng ding a si. A cang thei asi ah cun kawhhran member hmuahhmuah hi kawhhran upa pawl ih dungthluntu pawl ah hin pakhat khal hrelh loin um thluh thei sela. Cuvekih Pathian thu ih hruaiawknak ah cun nun thlengawknak, pianthar nak le dungthluntu pitling ih sersuahawknak a um ttheu a si.

(4) Hna le ttuanvo zemawk thiam

Kawhhran cak le nung tahawknak pakhat ih a telve mi cu member pawl rawngbawlnak sungih pumpe aw zet ih an cangvai hi a si. Cui, dungthluntu pawl ih a umtu pawl lakih sin mino fel fel, Pathian thu duhduh a phun phun an ra suak ding. Cutikah, an mah le talent, thlarau thilpek an co dan ih zir in hnapek le zem thiam hi kawhhran ih cahnak a si. Tthimnakah, Music group, thuthang tha phuang group, mission group, biakin ceitu group,  Sunday school group, education group tivek in a phunphun in member fel le talent nei pawl kan hmang thei. Ahleice in cuvek ih kan hman ding mipawl kha cu dungthluntu pawl ih kan member le cumi ttheh zo pawl si sela cutin Pathian thu ah kaihhruai awk le zirhawk a awl phah nasa ding. Hiti pastor in siseh kawhhran ih hnattuantupawl in hna zem kan thiam leveten, kawhhran member zaten mah le ti theitawk cio in Pathian kan rian thlang ding ih cutin, kan umnak kipah, kan fehnak kipah, Khrih ih thupek ropi –dungthluntu ah mi kan va tuah vivo ding ih, kan mai nun khalah dungthluntu sinak a lang dingih cutin midang khal kan mah vek si ding in kan hruai vivo thei ding a si. Pathian in a thu kan zate hrangah malsawm hram seh

Pastor Henry vl Hmangaih