DUHDAWTNAK CU A THIN A SAU

"GOD IS GOOD all the time"                  
                                                        Pastor Henry vl Hmangaih

Mikual duhdawt cu thil har a si lo. Asinan, na kiangkapih umpawl duhdawt, ahleice in nangmah thawi sunzan umtlang duhdawt hi thil awl ai lo zet a si. Pathian thu in duhdawtnak kan ti mi hi khaansa chhiat (feeling) menmen si lo, mi famkim lo nu lole pa duhdawt ding ih pumpekawk sawn a si tin in sim. Cui a takih duhdawtnak kan langsuah ter in dawnkhamtu tubik lakih pakhat cu thinhengnak hi a si.

Thinhengnak hi sual rapthlak tumbik pawl lakih pumpak in a thuptei kan rak cohlan ziar ṭheu mi a si. Langhngan ih sualnak tualthah, nupa ṭangṭawm sualnak, zu ritnak le sualawk buainak ti vek pawl lawng hi sual tin mi hrekkhat cun kan hmu ih thinheng hi sual a si tin kan hmu lo, a pawi lo kan ti liam men.  Kan hnaṭuanpi thinhengnak awhro thawi kawk in hna a sawtter ti a silolen kan fanau le awkam hrang thawi kawkin mi an ṭihzah phah ti zawng ih kan zum le fehpi a si ah cun nasa zetin bum linglet in kan um ti nak a si. Ziangahtilen James 1:20 cun hitin, “ Milai ih thinhengnak in Pathian ih tumtahnak a dingmi cu a hlensuah thei lo” tin in sim.

Atlangpi thuin, minung thinhengnak hi kan zalennak mi pakhat khatin in pahbalsak can lole kan lamzin le tumtahmi in khamsaknak canah a  langsuak ṭheu. A tawizawngin kan rel asilen, mah le mah thupi bikih ruatawknak le hngalnak lole puarthaunak ah a ṭhum aw bik. Thinhengnak  hmuahhmuah hi sual a si lo. Thinhengnak thianghlim a um kan ti thei. Ṭhimnakah Pathian cu sualtlun ah a thin a heng. Hitin Arthur Pink cun, “ Pathian ih thinhengnak cu  thinhengnak thianghlim si in sual a hua” ti ah a ti. Cui Pathian ih thianghlimnak cun sual huatnak a cawksuak. Ahman, Pathian cu sual le sualnak ah a thin a heng asinan, misual cu a duhdawt. Sam 103: 8 cun, “ Bawipa cu zaangfahnak le lainatnak a nei; A thin a sau ih a hmunmi duhdawtnak in a khat” ti ah a ti. Ngaingai te’i tiah cun Pathian  in kan nun in thleng a duh ruangah kan parah a thin a sau tuk lawm mam kan ti thei. Kan sual le palhnak bangin kan parah thinheng in in nuai cih vivo sela, zo ha tuini ah dam um nawn ding?   Khatlamah, A thinhengnak khal cu a taktak a si ruangah, ni ni khatkhat ah a mah dodaltu le a thu a thlun duhlotu pawl parah cun a takin a thinhengnak a sungbung sal ding.

I Korinth 13:5 cun duhdawtnak thu hitin, “ Duhdawtnak cu mawi lo in a nung lo, amai hlawknak lawng a hawl lo, awlten a thin a heng lo ih, midang ih thilṭha lo tuah mi a cing ringring lo” tin in sim. Duhdawtnak cu awlten a thin heng lo lole duhdawtnak cu a thin a sau ti ah a ti.

Thinhengnak hi mikip in kan tawn cio mi a si ruanah phun dangdang in cinfeldan khal kan ruat cio. Hrekkhat cu tsunami vekin a huk in an huk pi, an aukio in a phun ciamco, hrekkhat asilen tlangkang vekin sunglam ihsin a sat in an sa, tawngtam tuk si lo in sunglamah a alh in an alh. A lenglam ih  aukio ciamco a si maw a sunglam ih si a alh ih alh a va si khal len, Bible cun thinhengnak thuthawi pehpar aw in hitin  Ephesa 4: 26-27 ah, “ Nan thinheng uhla, sual tuah hlah uh: nan thinhengnak cu ni in tlakpi hlah seh. Diabol cu hmun kian fawn hlah uh” tin in sim.   Hitawk ih “hmun” ti mi hi Greek tongfang “ topos” ihsi a ra mi a si ih cumi cun hmunram a khih hmuh. Paul in kan thinlung sungah thinhengnak le khaatnak hmunram kan kian ding a si lo a ti ai a si. Asancu, hmunram kan pek tikah, kan nunnak in siatsuah dingah Satan sangka kan awn, a kuttang ih a duhduh ih mi hrut dingah kan nunnak kan siang aw ti nak tluk a si.

Kan Bible in kan thinhengnak thunun dingah thu in pe ( Eph. 4: 31-32), asinan, ziangtin cu mi cu kan tuah thei ding? Ahmaisabikah, daiten kan hmur kan cip ding cuti asilolen kan sirawk sal ding mi tongkam ṭhalopawl kan khaak sual thei. Apahnihnakah,  Kan thinhengnak san kha ṭhaten kan ruat ding ,  Shimei in David a camsiat lai, lungte ih amah le a hruaimi pawl a den, diklo takih Siangpahrang that ih puh a si lai ( 2 Sam 16) ih a tuah dan vek khan. Cumi ah David ih a sannak kha zohtthim a tlak zet, “ Bawipa in ka zonzaih harsatnak hi a rawn hmu pei ih, a tuih in cam rero can ai ah BAWIPA in malza I sawm tla a si thei,” ti ah a ti.  ( 2 Sam. 16: 2)

Thudik a si mi cu, awltei thinheng lo in kan um thei ti hi a si. Na zum maw? Na zum len Pathian bawmnak thawn a cang thei mi thil a si. Cumi ih tawh cu pumpekawknak a si ih cumi awlai tei thinheng mai lo nun nei thei ding ih mi caktertu ṭhabik cu Pathian na duhdawtnak lole ka duhdawtnak kha a si.  Pathian na duhdawt a si ah cun, a thu na thlun ih hleiah pumhlum in amah na rinsan ding. Kan covo le dinhmun sinak zaten Pathian hmaiah kan pharhawk thluh a ṭul cule veten kan thinhengnak siseh, kan harsatnak in sawng dingin Anih a rawng cangvai ding. Mi hrekkhat cun nan parih thil thleng mi le nan tawn mi pawl ruangah  nun nan ning. Na parih thilthleng mipawl kha nangmah in cinfel thluh tum hlah, Pathian ih thuṭhennak hmun kian thiam aw. Na hrang le ka hrangih thil ṭhabik cu thin sau tei um lole awl ai tei thinheng lo ih um hi a si cutin Davih in Pathian hnenih a ruahsan mi, “ A nungmi pawlih ram ah BAWIPA ih ṭhatnak cu ka hmu tengteng ding tiah ka zum. BAWIPA cu hngak uh la; Cakzet le ralṭha in um uh; BAWIPA cu hngak uh” ( Psalm 27:13-14)  pawl cu kan parah ti famkim a si ve ding. Duhdawtnak cu a thin a sau ! Pathian in lo thlawsuah hram seh.