THUPEK ROPI IH HMUITINMI LE CHIN RAM KHRISTIAN- VII

"GOD IS GOOD all the time    

                                                   Pastor   Henry vl Hmangaih
Pehzommi:

6. Kan mission rawngbawlnak kan karh ter lo

Kawhhran in mission hna a cawlhsan  le thlahthlam rualrual cun kawhhran a tumsuk in a thi ti sehla kan ti sual lo men ding. Kawhhran hmaisapawl an rak cahnak le an karhzai caknak bik cu Mission rawngbawlnak an thupit ter ruangah a si. Tuini kan Chin state kan zoh tikah ramthim kawlram pumpi nawr ding a um laiah, cupawl cu thlahthlam in kan nih vawi zatam, tu le tu a thei rero tu pawl sawn kan thupit ter theu tikah kawhhran a ngawr/caurau ttheu.

Ngaitei ti ah cun kan Kawlram mipum 50 Million ah hin , a percentage zawngih kan ttuat a si ah cun kan nih zumtu cu 6 percent hman kan thleng lo ho khaw. Kawl khawte le khawpi rundamnak thu vawikhat te hman a theih ih a thei hrih lo hi pal le vehvaih cawk lo in an um  lai. Culaiah, kan nih cun Pathian thu kha ngai khal kan ngai paih nawn lo a si lo maw? Hlaphuahtu’n hitin a ti, “  vawikhat te hman mi thawng tampin an theih loh laiah, nang le kei in vawitam kan thei non ce ding maw?” ti ah a ti. Kan ram kawhhran khal hi mission hnattuannakah tuhnakin hna kan tharthawh sal a ttul . Cuti silo in a nuamcin lawngah Pathian hna kan ttuan a si ah cun ziangtin saw kan ram, thimkhawzing ih a kulh mi cu kan tthiah thei ding. Kawhhran pakhat le pakhat – kan tuu le mee ti ih lawnsakawk rero hnakin , kawl ttawng a ti thei hmuahhmuah in ramthim lamsawn nawr in pan sehla , Pathian ih thupek kan phursuak sawn pei maw ti ah ruahnak ka nei.

KAN TTHAN THEINAK DING PAWL

        

    Kan tthan theinak dingah cun tui a tlunih ka rawn tarlang mi pawl hi a ttha lam ah kan her thluh a ttul.  Kan thupi “ Thupek Ropi ih hmuitin mi” fiangten kan theih le kan hmansuah a ttul. Kan relzo bangkhan a hmuitin mi cu “ dungthluntu ih tuah” hi a si. Pathian thu kan sim ih mi an pianthar tiang lawng hi a tawk lo, cui kan thusim nakih piangthar mi kha kan mah vekin midang rundamnak zinih  sim le hruaithei an si tiang kan kaihhruai, zirh le pitlinter a tul. Cumi tuah ding cun ziangsi dungthluntu ti mi kan zoh ta duak ding:

         

   Dungthluntu ( Disciple) ti mi hi Greek tawngfang cun ‘mathetes‘  ti  a si ih cumi ih sullam cu zirlai tlawngta( learner) lole thluntu ( follower) ti nak a si.  A sullam cu zirhtu saya ih hmuhdan le tuahdan cohlang ih thlun ti nak a si.  Thlunghlun le Thlung thar kan zoh tikah Dungthluntu hi Pathian mihman le Pathian mi pawl hin an rak nei ti kan hmu thei.  Amahlawngte Thlung hlun ah cun dungthluntu ti ttawngfang a hmang lo. Asinan, fiangtei kan hmuh thei mi cu Abram kha kan zoh asile Lot in a thlun ti kan hmu thei. Cun, Moses kha kan zoh asilen Josua in a thlun sal lala ti kan hmu. Cun, Kamsang lam kan zoh asilen Elija kha Elisha in a thlun ti fiangten kan hmu thei thotho. Culokhal rellang ding tampi an um thei. 

       

     Cun Thuthlung Thar kan zohsal asilen Jesu in mitampi a mah suk le so ih a thluntu lakih sin amah thawi naite ih um, a zirhnak le hruainak thlun ding le, a aiawh ih leitlun rawn fang tu ding dungthluntu hleihnih a thlang ti kan hmu thei. ( Matt 10: 2-4, Mark 3: 16-19, Luke 6: 13-16, Acts 1:13). Atir ih a hrilmi hleihnih pawl khal cu dungthluntu ti kawh thotho an si. Greek tawngfang cun “ apostolos” ti a si ih cumi ih sullam cu mi pakhat khat hnattuan pawimawh tuk ttuansuak  dingih a pu aiawh ih thlahsuah mi ti ai a si. Ttawngdangin kan rel a silen cu “ ambassador” hna vek a si. 

       

     Jesu in leitlun ih a camsung tawite ah khan leilung pumpi a fang suak thluh man lo ding ti a theih tikah, a um nawn lo hnu ih a aiawh ih a rawngbawl hna rawn sunsawm dingah hi minung 12 pawl hi a hril ih, thuthangtha 4 pawl kan zoh le zingzawi tikah can tambik cu Zisu’n a dungthluntu pawl thawn an hman thlan thu, a zirh thu le a hruai thu pawl kan hmu thei. Cumi cu tuini ah kan nih Chin kawhhran khal hin atakin dungthuntlu pawl (discipleship group or small group) tivekin lolen hming pakhat khat nei in kawhhran ih member pawl Pathian thutak ih punghman zirh le kaihhruainak kan neih a ttul tuk thlang in ka ruat. 

       

     Kawhhran tampi ih kan harsatnak cu kawhhran member siloin rawngbawltu sawn riangri kan si. Ziangkim ti thei Pastor ( Almighty pastor)  kan tamtuk ih kan member pawl in ttuan ding an nei lo tikah rawngbawl lo in kan tuah cawr thluh. Tthimnakah, kan member pawl hmang lo in kan mah in hla kan hruai, solo kan sak, sum kan kil, tohkham kan rem,  mikhual kan hmuak, usher kan ttuan tvk…  member pawl hruai le zirh ih an tuah ding hmuahhmuah kan tuah thluh tikah tuah ding nei lo in an um. Cun, mi hrekkhat cun keimah in ka tuah lo cun zo hman in tuah an tum lo an ti lala.. asi kha mi ruangah tak si dungthluntu pawl lole pawl fate (small group), zumtu thar le member kan zirh le hruainak hmun kan neih a ttulnak san.

Pathian in lo thlawsuah hram seh

PEHZOM VIVO DING