THUPEK ROPI IH HMUITINMI LE CHIN RAM KHRISTIAN- IV

"GOD IS GOOD all the time"
                                                          Pastor Henry vl HmangaihKAN TTHAN THEI LO NAK SAN HREKKHAT PAWL:

1.        Pathian thu upat le tihzah kan thiam lo. Kan saya le rawngbawltu pawl in nasa ngaingai in an mah le tithei tawk suah in Pathian thu kan theih theinak dingah tin thu in sim. Mah le kawhhran cio khalah sum le pai kan harsat pangah tin a lak rori in saya kawhhran in in kawhsak. Zirman pek ttullo in Pathian thu ttha ttha kan ngai ngah. Kan van ttha tuk lawm mam! Hmun harsa le ti duhdah a tuartupawl in kan dinhmun hi in daw kuahko. Asinan, khatlamah cutluk in kan vannei cing hin Pathian ih in duhdawtnak le duhsaknak kan thei thiam ban lo.

            Ka tlawngkainak ram Philippines zumtu pawl ih thuhla zohtthimtlak ka ti mi te lo ruah ka duh.  Kum 3 ttha an lakah ka khawm, ka ei , ka inn in ka tlangleng thlang. Cumi ah zohtthimtlak zet ka ti mi cu Pathian thu an retsang le uar hi a si. Anih ah cun Pathian thu zirnak seminar maw, conference maw, lole cabu khal siseh a lakih zem tile a lakih kai ti a um lo. Man pe fekfek in Pathian thu zir le kai a ttul. Nan, a duhtu cun sumpai tam taktak cem in ticket an lei ih cutin Pathian thu hi an sum le saw suah ta hrat le ziangha midang le ka innsang hrangah thlarau lam thuthup thar ka zir ding ti rori an ruat. Mi in cutlukih Pathian thu an lei le an retsan laiah kan nih Chin mi khawhran tampi le zumtu a ti aw tampi cun kaa lawngin Pathian ka upat, ka tihzah , ka duhdawt kan ti men! Pathan thutak le thuttha zirnak ih kan sumpai suah tla kan siang lo. A lak lawnglawng ih Pathian thu zir kan tum. Cumi cu mi kan banglonak a si. Mi pangai hrangih a lak rori ih mi thil neihsak tum cu ningzakza a si. Zumtu mi tampi cu kutdawt lungput thawi a nung mi kan tam tuk. Pathian a ttihzah, a upat le a thu a ngaisangtu pumpak, innsang, Kawhhran le ram cu Pathian in mal a sawm in a khaisang ttheu.

Pathian in lo thlawsuah hram seh!

Pathian thu hi a hming in kan zir men lole ka ngaimen, thlun le nunpi kan tum taktak lo si pei maw ti ruahnak ka nei. Cutlukin Crusade le camping zing in kan kai le nei cing khal hin nun thleng danglamnak le nun thar hmuh ding a vang zet thlang. Ahleice in a tui kan san ah phei hi cun Crusade le camping khal hin mi a hlen nawn lo, cuvek ih Pathian thu zir  khal cu kan ti dan kelte.. punghman ih Biakin ih kan khawm vek fangah kan ruat thlang.