Bible Cang hril: 1 Timo. 4: 11-12
Tumtah mi: Mino na si ruangah zohman in lo nautat hlahhai seh!
Zohṭhimtlak ti hi kan ruat tlang hmaisa kei, zohṭhimtlak nun hi a neih kan cak mi le kan duhzet mi cio a si ih, a sinan mi pakhat kan kiangnai bik ih duh zawnghmanih um thei lo minung kan si. Mitling lo, mifel lo le mifamkim lo kan si i, hi nun hi thil harsazet a si. A sinan neihthei dan cikhat te kan nei ih cu mi cu kan phuansuah tum tak cu a si.
Tahṭhimnak pakhat mi hman ringring mi ka vun la ta duh,Cangai pinu in a fale feh a zirh, sir zawngin feh lo in hmailam zawng in feh uh a ti a kawk rero nan cangai hrangah a awl lo ih, an feh veten sir zawng hlirin an feh khulkho, cutikah a nunin a kawkih khatin a si lo hmailam zawng in a ti ih, a ka nu nangmah in in hruai aw la kan lo thlun ding an ti tikah, a nih khal in si e a ti a hruai hai ih an zaten sir zawng thotho in an feh ti a si. Kan nih khal kan harsat zet mi zohṭhimtlak nun hi kan nunhlun thawi hman kan tum cun mi mitkem za ah a suaksawn theu. Hi hi kan Pathian in a thei cia ih curuangah a mai nun kan sung ih rung nung ding in, amah in in rundam kan sual in ngaithiam hnuah a Thlarau Thianghlim in in luhcilh ih, kan sungah Krih sawn a run nun ter a si. Kan Pathian hmin thangthat in um seh.
Cui kan neih mi Khrih nun cu mi hmuahhmuah ih zohṭhim tlak a si. Kan tak safeh tlang in a nun a rung langsuah tik ah, kan nunah mi in Khrih hmel an hmu ih lungawinak thar an co sawn theu. Cu mi neitu kan si ruangah a hnuailam ih thu hi Paul khal in Timothe hnenah a neih thei lo mi a fial si lo in, Khrih nun a neih mi kha mi hmuh ih langter dingin a forh duh a si sawn, cu vekin zumtu kan zaten Khrih nun a nei tu hmuahhmuah in kan hman thei mi nun a si ti thei tlang cio uh si.
Kan thu tum a hnuailam ih Ca tluan panga pawl hi zoh tlang uh si.
- Mi no na si ruangah zo hman in lo nautat hlah haiseh a ti. Kan neih mi khrih nun hi mi hmuahhmuah ih upat tlak a si ti thei cio seh la.
- Na hmurka na tongdan, nitin kan ṭongmi hi kan sungnung Khrih ih duh zawng a si maw ti theifiang seh la, tongkam hi a thu pitzia nun lam hruaitu ti mica buah Rev. Khuang Hlei Thang in a ngan ih “Tongkam khat sepi manti” ti hmangin a khualtlawn laiah leiba hlam dingin a fehih a baktu nu thawn an tawnawk veten, tu lawkmai ih leiba mi hlamtum a ti ih, na tak in ka lo hlam ding le ding lo hman theihrih lo ih cu vek ṭong cu mi cu thil kan lei ah kan payment thakthak ho khaw ka ti! a thinheng tuk ih “Pawite leh hngal Police ka man tir tak hngal loh che” i ti, cun kei in aw Ringtu ih ka tong a na deuh in ngai thiam aw ka ti, cuveten a nih in kei mahsawn si lawm pacangṭha hmaiah ka ang vakvak mai i! ra aw lakphak kan in kei i tiih lakphak in do hnuah khui maw paisa teh ka nei maw a ti a dip a zoh ih i bakmi hmuahhmuah in i pe theh a ti. Nun nei zo veve ṭongkam ṭha Pathian tihzahnak thawi kan hman veten mi nun a neh mai.
- Na um tlan na ziaza. Kan um tlan kan ziaza khal hi Bawipa in a sunlawinak ah a hmang duh ih, curuangah kan nun hlun cross ih in thahsak zo mi in kan parah thu neinawn hlah seh. Bawipai hmel a langmai, nu le pai nun sim theih lo hman Jesuh an neih in sim tul lo in thilṭha in an nun a luahkhat theuih, lei dan ih misual ih kan ngai pawl an pian thar ih nun danglam an neih hi Bawipa hnatuan a hmelmawi tak cu a si lo kan ti thei ding sawm?
- Duhdawtnak le zumnak ah a ti lala. Khrih ruangih kan neih mi duhdawtnak hi mi in duhdawt ruangih kan duhdawt letsal nak thawn a bang aw lo. Ruangum lo duhdawtnak a si ti theih cun, Thlarau lam ah pacang tak le zumtlak zetin mi kan duhdawt thei zo a si. Zumnak ti hi Pathian hnen ih kan dawnmi, thilti theinak a si ih, Pathain in kan hnen ih tuah ding ih vo in zem hnuhnu a mah in a hlawhtling tir ding ti thei in tuan uh si.
- Thianhlimnak khalah zumtu dang pawl ih zoh thim tlak in nung aw a ti.
Zum lo tu ih zohṭhiam ding lawng ah kan neih aw ṭheuih zumtu kan kiangih um mi pawl ih nun zoh ṭhim ding ka si ti thei tlang cio uh si. Zumtu pakhat le khat zum lo tu si sawn sehla ka ngaithiam thei ding nan a tisa tuk kan ti aw theu khi tisa le tisa kan sual awk tir a si, Thlarau tongkam pakhat te tong sehla cu hman in ka buainak a reh tir thei.
Curuangah lei dam sungah hi ti nun hi a theih lo ti ruat tu ka um theu ih, a pawizet van thlen hnu ah zohthim tlak in nung aw ti a tul nawn lo ding, lei ih kan damsung ih kan nun dingah a thlarau in peknak san a si.
Siartu nan zaten Pathian in lo thlawsuah hram seh.
No comments:
Post a Comment