FALAM PACANG LE NUCANG PAWL SAWMNGIARNAK (CHALLENGE)

Dear Khuazakip ih Falam Pacang le Nucang Pawl,

A liamciami ni hnih (March 8) ihsin leitlunah Pathian in i zaangfah ih kum 21 sung ka tlang leeng ve thlang. Cumi sung ih ka cin sun tete sung in le a cangzo mi thil pawl thlir phah saal in ka lo sawmngiar (challenge) hai ding.

(A fiakzawng le midang hnong zawng thil pawl a pom lotu ka sinan...tutumah cu ziangkhal lole FALAM ti'n ka hmang ko ding. Ziangahtile kan mah sung le sung rori a RUH lang ko ih rawt ka duh ruangah a si).

FALAM cu Khaipa kan si. Tong neitu kan si. Chin miphun lakah kan cungcuangbik. Khualipi hmaisabik a si. Thil tithei kan si ti'n kan AU rero mi hi kan zoh saal hnik pei uh. Ka nauhak lai (kum 7-14) tiang hrawng ih ka thei ringring mi tong pawl cu " Falam cu a si dah, a um dah, dah, dah , dah" ti lawnglawng a si. A caancaan ah cu ka u le pawl a hlan ih FALAM ah cumi, cumi a um dah, a si dah nan timi pawl cu a tuteh khoiah? tin sut fukfi ka hiar theu. Cun ka kum ( 15-21) tiang ka thei lala mi cu " Falam cu kan si dah nan .. kan it that reituk ruangah cang a cim. Kan lungrual lo ruangah, Lole cu pa , cu nu ruangah", tiah kan mah le kan mah mawh kan phurh awk ciamco lala. (Tawk deuh lai...a hlan vek in " a si dah, a si dah" ti lawnglawng rel nawn lo in kan tling lo zia kan hmu fiang aw deuh thlang ih). Kan mah le kan mah kan puh mawh awk rero sungah mi dang pawl cu tlang za dan an kaan zo. Kan tumsuk, a thing, a rop tiah kan kaa in ol zet in kan suah vuahvo in a tung ding saalnak cu ka khuaruah hmanah kan ruat pang dah lo.

Sile,

Falam khua ziangruangah a thangso lo? Falam pawl ziangruangah  kan thenthek aw theh? Falam pawl ziangruangah mi kan bang lo? ti'n sut aw ciamco sehla a let daan cu kan thiam nasa cio ding ka zum. Asile ziangah kan thangso lo ih mi kan bang lo ti kan thei keukeu fawn ziangah kan rem aw lo ti'n sut aw lala sehla cu THUSUHNAK lawnglawng ti a si lala ding. Asinan a cui thusuhnak cu a let theitu kan um thotho ding fawn.

Kan unau Hakha Tong hmang pawl Kawhhran 32 an kom aw ih pawlkom pakhat pi an nei  USA sungah. Kan unau Tidem Tong hmang pawl khal Kawhhran 26 an kom aw thei. Asinan an zate'n zumnak khat le pom daan bang aw mi Kawhhran khat an si pei maw? Si hlah e ! Lole ziangti'n  AN KOM AW THEI? ti mi thusuhnak cu simtu um lo hman in kan thei cio mi a si. Tong khat hmang unau kan si ti an thei aw fiang ruangah a si. Pathian thu an thei ih Khrih ah unau kan sinak thei aw in an kom aw ka ti le kan mah Falam pawl mualphoh rero ah ka cang pang ding. (Mualpho rero cia lakah phoh aw bet ka paih lo). Ziangahtile Khrih ah PUMKHAT kan si tiah au cu kan FALAM pawl hrangah cu NINGZAKZA a si lai in ka thei. Ok ... sile mi dang pawl cu zum daan le  pom daan dangdang cio hmansehla Kawhhran 32 pipi le 26 pipi an kom aw. Kan ni teh? Ziangtin?  Chin Miphun hruaitu, Tong neitu , Khaipa kan si a ti aw rerotu pawl KHOI NAN HLO THLUH? Ruat rero, ruat rero in cu THIN HI  A NAATUK sokhaw. Pawlkom pakhat kan duh lo asile a duh lo pohpoh kan mahte'n kan din ding kan ti lailai. Tih a nungtuk. A um cia mi hman ti tham lo kan si laiah a dang a thar kan ti vivo cun kan kek sinsin ding.

Hrin le Hnam tete sungah nathrik sia in in nuai ciamco ih kan keu that aw theh tum fawn. Suk le so ah Falam kan dir theh ih a tleek theh zik ngaingai thlang. Hrin tum deuh ka si lole kan tam deuh kan ni cu tiah a ruat aw tu pawl in Hrin hnam fate deuh pawl kan zoh niam. Mimal deuh pawl  khal in duh ve ce lo in an ni teh ziang cuang tiah kan um. Kan bang aw theh. Cuti thinlung kan neih sungah midang cu an rak zam hlo theh zo.

Calai thu le hla ah le mithiambik kan si theh. Mah tuanvo lo kan tuan. Mah tuanvo hman kan thih hlan lo kan tuan cawk pei maw tiah khuaruah har lakah mi ih tuanvo kan va tuan ciamco. A dikbik kan hawlnak ah kan peeng theh. Ka pom daan rori lawng a dik tiah kan baan kan phar sungah kan rawl suannak beel a taw a rak ong man.Midang pawl tlangpar thleng dingah nazi 2 tluk kai theu mi  kee awl pa in tlangpar thleng dingah nazi 5 zik lai thi zik in kai bang sehla a oltuk tlangpar kai tiah in bum sehla kan zum har nasa ding. Cuvek thotho in a fiang keukeu mi le hmuh keukeu mi cu tusanah bum awk daan a si lo.

Falam Christian Church of Indianapolis (USA) ih Pastor Hre Mang in " Zumtu ka si ti na cing in zumtu dang pawl thawn pawlkom aw thei lo, to tlang ding tlang thei lotu cu zumtu dik a si thei lo. Leitlun hmanah kan hmu aw thei lo ah cu VANRAM ah nitin hmuh awk ding cu a ol lo. Na raalpa VANRAM ah a um cun nang hellram ah na feh tul ding. Zumtu unau pawl kan zumnak hi cekfel saal uh si", tiah March 6, 2011 FCCI Kawhhranah thu a sim. Ka lung a kimtuk. Zumtu ka si ti aw fawn ih midang Kawhhran cu MITHI vek in zohtu cu Vanram khal kan kai ding ka zum lo. Mah pom daan le zum daan lawng  dik bik ih hmu theutu cu netabikah ANMAH lawng an taang theu.

Falam Pacang, Nucang pawl ra suak hnik uh ! Nan tefaa pawl in ziangmisi kan ZIR ding nan hnen ihsin? Nan thih theh hnu ah teh Kawhhran kan run din vivo ve ding maw? Pawl kan run then ve ding maw nanmah bang in? Nan tefaa pawl hrang in ruat sak ve hnik uh. Thi zik ih nan aukio rero mi hnak in nan nun daan le nan zawh mi ziin sokhaw nan FALAM FAPA le FALAM FANU in kan lo zoh. Ziangsi nan FAHNIANG pawl hrangah RO in taanta ding? Thenthek awk daan Ro, Pawlkom aw thei lonak Ro, Kawhhran din daan Ro, O le Aw ih buai ciamconak Ro, Hrin tenau tete ah buai ciamconak Ro le Miphun pi tumsuk ternak Ro maw in roh ta ding nan te le faa pawl? KAN DUH LAMLAM LO ! Cuvek RO pawl in taanta ding hnak cun RO khal in pe duh hlah uh.

Hotu, Hruaitu le Saya ti'n a ti aw rero tu kan nu le kan pa pawl kan lo SAWMNGIAR. Nan Faa le pawl ziangmi RO in taanta ding? RO kan ti ruangah thihsik zawn lawng ih pek awkmi RO kan ti lo sokhaw. A tu ih na kekar daan le kan Miphun pi na hruai daan khal a tel. Nan Faa le pawl aatnak suumzing sungah in hruai lut hlah uh. Nan nuntu khuasak daan pawl a zate'n kan lo thlir rero. Nan hnen in kan zir... nan nung kan lo cawng. Lamziin peengah in hruai hlah uh law. Thenthek awk kan duh lo. PUMKHAT si kan duh.

Hminsin : Himi cahram hi leitlun hmunkip ih a um mi Falam website pawl, blog pawl , Thuthangca pawl le Tlangcabawm kipah suah sian a si.

FALAM MINO zate aiawh in,