Hngahmi dang na nei lai maw?

Text:     Luka. 7 : 20, Matt. 21 : 9.                                                 

March 20, 2011 (Sunday)

Sermon Revd  Ro Khar Thang (Rtd)

1 (a). Johan ih dungthluntu pawlin, “a ra ding mi cu na si maw; midang kan hngak hrih ding maw? tiah Jesuh hnenah an sut. Thusuhnak poimawh le mi thinlung sun tlang thei, hna sungih khawk zet mi thu an sut. 

Sut dingih  a fialtu Johan le dungthlun pawl hi Jesuh cu Messiah a si ti thei fiangtu an si. Cui tlunah Johan le phei cu Jesuh baptistma a pek lai rori ah van sangka ong in, “Hi hi ka duhdawt zetmi ka fapa a si”  tiah van lam aw ih a run sim mi thei fiangtu a si. Cutluk ih theih fiang zotu in, ‘midang kan hngak hrih ding maw?’  ti ih va suh ter cu thil tul lemlo a bang zet.

(b). Himi zawnah kan theih tul mi cu, nitin te Jesuh dungthlunih feh tiaw si-in, thei fiang ngaingai lotu pawlih dinhmun a lang tir a si. An thusuhnak tongkam cu kan mai nunnak ciar ah sutaw in kan thilung sung in khei tu si ciau hram seh. Jesuh ah kan thumaw cutci zo maw? I khirin I hnong pang pei maw; lei par thil hmuahhmuah lak ihsin, ka nunnak ah Jesuh dawnkhamtu a um pang maw, ka nun ah ziang thil si lal bik ih ka ruahnak luahkhat tu? Tiah sutaw  ve hnik! Na nunnak lamtluan hrangih thutluknak felfai tuah thlang aw. Jesuh pom le thlun maw; hngah mi dang na nei lai maw? ruat tha hnik.

2. Jesuh cu Jerusalem ah a feh tengteng a tul. Cumi cu olai te ih thutluknak tuah men a theih lo. Ziangah tile profet pawl lungto thawn a deng thattu khua a si.

(a). Van arsi tleu depdo le zan daifim hnuaiah a PAI hmel a hmuh theu nak, hmun him le dai nuam zet Galilee tlang nuam pawl cu a fehsan a tul. Rinsan mi a rualpi pawl le duhdawt zet mi pawl khal a fehsan a tul. Mo puai ah siseh, mah le an in lamah siseh duhsak zetih rawl kho kilpi theu tu pawl, lo nei mi le nga kai tu pawl khal a tan thluh a tul.

(b). Suaksual zet le diklo zetih lairelnak hmun Jerusalem khawpi cun ral bawhin a rak bawh tengteng ko nan mangbang vansang in le camsiat, vualvelh le na tuar ngam dingah a panih a luhcilh rupro mai. A feh thotho a tul.

(c). Minung le rampi cu an thinlung muril rori neh a tul vekin Jerusalem cu an hnam pumpi ih muril a si. Hriamnam thawn midang nunnak kan neh hmanah an thin lung muril cu duhdawtnak thaw lawngin neh theih a si ti theifiang in Laak note parah to in tangdornak thawn, hriamnam zianghman keng loin a dungthlun  dorkok (cak lo) tete pawl thawn khawpi cu an luhhnawh a si.

3. Jesuh cu Jerusalem ah an rak lawm ding maw an rak hnong ding timi lungruah har zet nei phahin, a dinhmun riahsiat za cu hril ngamin a feh suak.

(a). Va feh thei, feh loin tlansan thei khal a si ko! Kannih sisehla ziang kan hril pei? Zohmanin mai thihnak ding hmun thei cingin kan pan lemlo ding! Asinan Jesuh ih dinhmun cu a fiangfai lawlaw.”Ka hnenih a tang lotu cu i dodal tu a si” in ti. Kan thlun ngam pei maw? (Mat. 12: 30).

    i) Lal thar danglam zet a sinan Car mawi zet parah hngal zetin a to lo, tangdornak thawn Laak note parah a to men. A thluntu mipi pawl khalin an kutah ralnam aiah tumkau le hnahsawl lawng an keng ciau. Khuang le dar, tawtawrawt awn si loin; rinumnak authawm lawng a thang.

   ii). Jerusalem khawpi cu kan natnak le kan buaibainak nun thawn a bangrep. Pathian lawngin in damtir thei ti kan theih vekin Jerusalem damnak dingah Jesuh a sungah a lut. Mi zapi lak ihsin tangdornak thlarau nun neitu pawlin an mit rori in Jesuh cu an hmu ngah zo. Pathian an hmu ngah zo ti, an thei fiang. ‘Midang kan hngak lai ding maw?’ ti ih suhawk an tul nawn lo. “Hosana, David Fapa cu thangthat uh, Bawipai hminin a ra mi cu Pathian in a thlawsuah pe ko seh, Hosana” tiah an au ih zodang hman hngah le beisei mi an nei nawn lo.

(b). Tumkau ni (Palm Sunday) ni  kan naih cuahco thlang. Mitthla in Jerusalem khawpi hei cuan ve hnik! David ih khaw pi khi. An zum duh lo mi, an dan kalhih thuzirhtu, Jesuh ih va thleng cu ziangtin saw an rak upat thei ding!

        i). Cui khawpi cu thuthentu mifim pawl, hremnak pe theitu lal le upa tampi thawn a khat reprep. An hnam pumpi ih thuanthu neitu khawpi a sinan mi tampi hrangah tluk le bahnak thlentu, thlarau nun buai tirtu khawpi ah a cang. Leitlun pumpi ah ningzah mualphonak tarlang suaktu le mawhphurtu khawpi ah a cang zo.

       ii). Khawpi puar le hngal zet a si ih, Jeremiah in a mitthli thawn an lamzinpi pawl a kholh sak mi, an Temple sungah profet Isaiah ih awkhawk a thang. Hosea ih tahnak aw nemte khal a cambang lai. Amos ih zirh mi khawtlang nundan tha le mawi khalin a tuam mi sikhawh! Cui Lal thar ‘Jesuh’ cu ziangtitakin rak zohin rak cohlang kei hai maw!!!

4. Jesuh cu Jerusalem ah fehin ram uktu le thuneitu pawlih hmaiah Vancung Uknak Thu a than ding.

  Cui khawpi cu duh hril dingah a nor thlang ding. An rak pom ding maw an el ding? Sal taan nak ihsi hruaisuah an sinak an pupa pawlih ‘zanthim lamtluan’ pi ih sullam hmuahhmuah cu an mithmuh ah pho lang a si zo. Adam ih si thokin Abraham  tiangih an beisei mi le an sunmang hmuahhmuah lengah Abraham ihsin Adam neta (Jesuh) tiang an beisei le an hngah mi cu an mithmuh rori ah pholang a si zo.

Hngah mi dang an nei lai thotho ding maw? Unau nang le kei khal tui kan san neta lam tiangah, hngah midang kan nei lai maw? na hngah mi le na beisei mi na hmuak ngah zo maw, nan tongaw zo maw. Na thinlung muril (Jerusalem) ah Jesuh na mi khual ngah zomaw. Hngah mi dang nei duh nawn hlah kung!

Thu kharnak:   “Hosana, a sang bikah Pathian cu thangthat si ko seh” ti-ah ‘Nehnak Hla pi’ kan sak thei zo maw? A fiangfai lo mi tihnung zanthim hnuaiah siseh, ropral thei le siatbal thluh thei mi leitlunah kan nunnak kan taksa rori  hi, Hosana tiah au thlang seh. Hngah ding dang kan nei nawn lo. Amen