A LO NGAIHVENTU RUAL ṬHA NA NEI!

"GOD IS GOOD all the time"

Tuini ih ka lo sim ding mi hi na zumlo tla  a si men thei. Asinan, duhdawtmi ka rual, a dik a si ti thu ka lo sim ziangahtilen hi Pa hin kan nun pumhlum in thleng danglam a si.

    

Cu Pa cun tawpcin neilo in a lo duhdawt. Aliamcia ah zovek milai na rak si dah ti kha thupi bikah a ret lo. Nangmah a lo duhdawt tuk ruangah mi in a â an ti phah. Nangmah thawi pumpak ih pehzawmawknak hnget le duhnung neih a duh. Nitin nangah thawi lentlang ding hi a duhsam le tumtah mi a si. Nangmai parah siseh, midang parah siseh, Pathian hmaiah siseh  ziangtluk sualnak rapthlâk le tûm na rak tuah zo a si hmanah tuini ah lo ngaidam le amah thawi ke na kar tlang ding a duh.  Nan nunnak lo thlawsuah siseh, thil ṭha ih lo vur a duh lawng siloin na hmailam nuntu khawsaknak hrangah ruahmannak le tumtahnak duhnungza a nei.

Feh ngaihnak thei lo ih zinpeng na zawh cân ah siseh, mangbang vansangih na ṭah le aihram cânah siseh dîmten a lo kau ṭheu.  Na kiangnaiah a ding camcin ih na harsatnak hmakhat ten na kawh tikah lo bawm a duh.  Aw nemten na thinlung sungah a lo kau ṭheu.  Na phurrit le vansannak hmuahhmuah a hnenih ṭhum le Amai hnenih cawlhhahdamnak le nun diremnak um mi, khawvel ih a pek theilomi nun hnangamnak thuthup tla lo pek a duh.

Hi thu hi thu ngaingai a si. A lo duhdawt tuk ruangah van sunlawinak le ropîtnak khal thlahlel thei lo in hi lei hmun khawhar le ṭah aihramnak hmunah a rawng ṭum.  Minung ih kan sualnak pawl hmuahhmuah cu Amai parah a phurih cutin kanmai sualnak ruangah duh dingtlak um nawn lo le mawinak hmuahhmuah siat thluh ko in vuak le velh a tuar.  Cui a tuarnak cu miluat le zalen,ṭihphannak le hremhmun râpthlâk lak ita kan luat theinak dingah a si. Sual leiba kan pek thei lo mi cu Amah in a taksa ih a tuarnak le a thisen thianghlim in in peksak.  Nun kan neih theinak dingah , misual pawl an khenbehnak thinglamtah parah a kut pahnih pharin “  Ṭheh a si zo” ( John 19:30)ti ah a ti.  Kan hrangah thihnak a tuar, phum in a um ih cutin nithum hnuah thihnak neh in a thosal zo ih atu ah cun kumkhua Rundamtu le Pathian si in a nungsal zo!

Atu ih na umnak le na dinhmun ihsi khan a sânnak hmun vanlam khi hawn cuan hman.  A aw na thei maw nangmai hming rori in a lo kau? Duhdawtmi ka rual, na harsatnak le natnak thuthup khal a thei thluh. A hrangah na thinlung sangka na awnsak pei maw? Nang le kei in kan phu lo cingin kan hrangah khawvel ih â an ti khawp tiangin in duhdawt. Vawi ziangzat na rak hnawng in na ngaihsak lo a si hmanah, a lo duhdawtnak cem thei dah lo cun a tu rori khalah a lo dawithlun lai thotho. Aduhdawtnak kut na lamah a phar ih , “ka duhdawtmi, ka ṭângsung ah himdam ten ra aw” ti ah a lo ko. “ Ra aw, hinah na hrangah ka um” ti ah a lo ti. 

Ka rual, tuini ah cutlukih lo duhdawttu le na hrangih a nunnak tiang liamtu’i duhdawtnak cu na hnawng men ding maw si?  Ka thinlung sung muril ih ka lo duhsaknak sangbik ka lo sim ding “ Zisu in a lo duhdawt taktak ti ka thei.. na sinak vek in a lo duhdawt” ziangruangah tilen a thutak in fiang emem in in sim a si. ( John 3: 16).  Nangmah a lo ngaihsak le a lo ngaihven hi tuini tiangah a tawp dah lo. Thûksin le kausin ih lo theih a duhlawng si lo in a mah na pan ding hi thinfual ten a lo hngak ringring. Rundamtu Zisu in nangmah lo duhdawt a bang thei lo! Nangteh in cui duhdawtnak cu ziangtin na sawn ve ding?

Pastor Henry vl Hmangaih

__._,_.___