Monday, September 5, 2011

RUNDAMNAK THUAH THUM

                                                                      By: Stephen Tha Nei Fai

Jesuh Khrih ih Rundamnak hi sakhaw dang hmuahhmuah ih an neih lo mi  kumkhua thil maksak a si. Eden sual in minung thlarau a that (Efe.2:1) ih minung thinlung a selingletter theh  (Jer.17:9). Cule minung taksa cu ke in luthlung zim tiang hmasia in a khatter theh (Isai.1:5-6; Saam 38:3).  Satan ih  thih termi minung thlarau cu Pathian in Khrih sungah a nung terih  a selinglet zomi thinlung cu thinlung thar in a thleng (Ezk 36:26, Jer.24:7). Cule  natnak ih khatmi taksa cu Jesuh an vuaknak  vualah in damter (Isai.53:4). Cuih Rundamnak thuah  thum cu kan zir tlang ding.

A. Thlarau Rundamnak  (I Pet.1:9)
 
Rundamnak thuthangtha kan congah le veten kan thlarau in Pathian tang sung a hung luahih kum
khawdaih in Pathian in Khrih sungah a rak thup (Kol.3:3).  Veikhat pianthar hi  thlarau hrang ahcun sankhuk daih a si. Hlo thei nawn lo dingin Pathian  vorhlam kut sungah kilhim in a um (John  10:29).
   (1) Kan thlarau cu thihnak in a ngam lo (I Kor.15:55-58)
   (2) Satan in a tham ban nawn lo (Rom 8:31)
   (3) Mithi khua in a neh thei lo (Matt.16:18)

B. Thinlung Rundamnak (Heb.9:14)
 
Zumtu tampi cu Pathian zangfahnak in thlarau rundamnak kan co nan thinlung rundamnak co hrih lo kan tamzet. Piangthar tho si mihuat ngah emem, duhham emem, thintawi emem le mihrang ih torhmawh kan tamtuk lai. Cuih thinlung rundamnak cu  Pathian Thlarau cahnak rinsan in kan do thei. Thinlung rundam kan tulnak pawl cu:
   (1) Thintawinak sungin (Efesa 4:26-27)
   (2) Mithil dawtnakin (Tirh.8:18-23)
   (3) Zuunngai lunglennak in (Saam 30:11)
   (4) Hngal le puarthaunak in (Daniel 4:34-36)

C. Taksa Rundamnak (Rom 8;23)
  
Pathian in kan thlarau lawng si lo in  kan taksa rori khal hi rundamnak famkim co ih a hnatuannak hriamhrei dingah a duh. David in ,"Ka nunnak cu thihnak lakin, ka mit cu mitthli  lakin, ka ke cu rilhbahnak lakah in kilkhawi,"a ti (Saam 116:8).
       
Kan thlarau Rundamnak cu kan ni ih tuah theimi zianghman a um lo. Asinan kan thinlung le taksa rundamnak cu Thlarau zarah kan tuah thei ve. Curuangah Paul in,"Rundamnak famkim nan ngah theinak dingah tih le thia phahin nan Rundamnak tuan suak uh," a ti (Filipi 2:12). Thinlung le taksa rundamnak cu van kainak a si lo. Leitlun ih  hahdam zetih tlanlen theinak a si.

Pathian in vancungmi pawl khi leitlun ih a palai dingah a ko lo. Santlai lo  zumtu pawl hi   in duhih in hawl, in ko, in hril, in rundam (II Kor.5:20). Curuangah taksa ih Pathian tihzahnak langter hi a thupi tuk lawlaw.

Siartu hmuahhmuah Pathian in lo thlawsuah cio hram seh.

No comments:

Post a Comment