Zir ih Nunpi

Himi thu hi Pathian thu khla ah, leitlun thu khal ah "Zir ih nunpi" ding a si. Ka ruat deuhdeuh ih a thupi ka ti deuhdeuh. Pathian thu lam rel hmaisa sehla, camping le crusade tampi kan kai, Pathian thu kan thei kan ti nain, a tulmi zir ih nunpitu kan mal nasa. 

Leitlun thu khal ah thil tha kan hmuhmi le kan theihmi cu zir ih nunpi a tul rori. Tahthimnak ah Singapore kan thleng, an khua thianfaizia kan hmu, kan innsang le kan kawhhran, kan community ah zir ih nunpi a tha. Cun, mihrek tla cu mi ih inn a thianghlimzet ih an tuahmi rori khal hnawm in kan bawrhhlawhter men. Zu in lo a tha ti kan theih le zir ih nunpi ding. 

Fimthiamnak thu maltein ron rel sehla, phunhnih ah kan then ding ih Formal Education le Informal Education tiin. 

Formal Education cu a thiammi hnenah va zir, acozah lole private hnen a si khal le nuamtetein pakhat hnu pakhat zir vivo khi a si. A olnak cun "Tlawngkai" khi a si. Tlawng le zirnak pohpoh kan hmuhmi le kan theihmi tawk, kan tlintawk, zir in nunpi sehla, kan hmu thei in kan thei thei deuh ding si. Chinmi tampi cu mihlawhtling hnakin an hlawhtlinnak lawng kan duh theu hi a poizet in ka ruat. An hlawhtlinnak hnakin an hlawhtlindan kha zir ih nunpi ding sawn a si.

Informal Education cu kan hmuhmi le kan theihmi parih zir a si. Experience ihsin zir tla a si ko. Mi in thil tha an tuah kan hmu ih kan theih ahcun zir ih nunpi ve ding. Mi ih tuahmi lawng kan lungawipi ih kanmah in tuah ve, nunpi ve kan tum theu lo hi a poi tuk. Chimmi kan thlennak pohpoh ah a rak umciami pawl ih thil sual cu cawn kan thiamzet nain thil tha cu zir ih nunpi kan tum theu lo. 

Ramdang thleng Chinmi kan zoh tikah a umciami rammi pawl hrangah luaksuakza kan si theu. An nuncan tha zir kan tum lo hi a poi tuk rori in ka hmu. Zuri ih hawr cuarco umlonak khal ah kan va ri ih kan hawr cuarco ngam. Kuanza hang sen emem in kan va phut ngam thotho, hnawmbal khal kan tuah ngam thotho. Biakinn sung rori khal ah kan fale maw, kan mino pawl maw, hnawmbal thei mi ei in kan tonak tang le kiangkap vek ah tla hnawm kan thla hluahhlo men. 

Calai le cangandan lam maltein von ther sehla, group mail ah ca tampi kan siar, cabu le thuthang ca tampi kan siar nain, ca kan ngan tikah a thiamdeuh pawl ih cangandan zir ih nunpi kan tum lo. Mah thuthu te sawh kan tamtuk. Group mail ih kum khat lai ca siar zo le ca ngan phahphah pawl tla cun cangandan ah mahtein thangso ding kan si lo maw?

A sautuk pang ding. Chinmi tho thlang aw, thil tha na hmuhmi le na theihmi zir ih nunpi a cu zo