Kan Pastor Pawl Kan Harsa Ter Tuk Pang Maw?

Pastor ti veten nan thinlungah ziangmi a lang hmaisabik? A phunphun lang mi lakah an harsat daanzia pawl teh a lang tel maw?  Laimi pastor ziangmawizat lakah mi paziat in ha an thlahlawh khawpkham in Pathian hnatuan um? An mal zet ding!. Pastor inn sang cawmnak khawp, kawhhran pakhat in a neih lo ahcun cuih kawhhran/fellowship cun an pastor harsatnak an pek a si. Kan pastor hnen ihsi kan expect mi a tam fawn. Pastor feltak, thusim thiam tak, member vehvaih law zet, mibiak le hawiher ah sawiselbo tluk le zirnaklam khalih upattlak pawl kan duh ih kan phut ringring mi pawl tla a si ding ka zum. 

Asile, kan pastor pawl kan cawm neh maw tiah sutaw sehla, Kawhhran/fellowship pakhat dinhmun ih pastor pakhat cawm theilo ticu zo in a duh ding? Asinan, kan cawm theile theilo lawngte kan pastor tei’ sungkua lawngin an thei ding ka zum.

Kei cun thupte ih harsa tuar rero pawl lakah Pastor pawl hi an tel hrimhrim ding ka zum. Laimi hin pastor cu harsa deuh ih um dingah daan kan tuah vek tla in ka hmu zik theu. Pastor sungkua cu harsa ding hrimhrim ih ruah khal a um thei. Cuvek ruangah pastor nupi si duhlo tampi an um phah. Kan pastor pawl kan zoh daan hi kutdawh tla an bang ka ti phahphah. A naa nan ti deuh ding. Asinan kutdawh hnakih an har caan tla a tampi sawn ding ka zum. Pastor kan si lo ahcun pastor pawl ih harsatnak kan thei theh lo ding khal ka zum bet.

Kan unau Kachin pastor le Matupi pastor hnen khalin an pastor thlathlawh an khawpkham lo ruangih an sungkua ih harsatnak an tawnzia le member pawl tiangih harsatnak an thlenziapawl khal in sim hai. Cuih umzia cu member pawl hin kan pastor harsatnak pe dingah kan la tluk a si thei lala. An harsatzia an member pawl hmai ah an sim ngam ding fawnlo. An thla hlawh dawnmi in an sungkua a daih lozia an sim suak ngam ding fawn lo. Kawhhran bupi pawlin le an khawp pam ko, pastor thlahlawh ahcun a tawk ko ee, tiin an tih caa a um thei ding fawn.

Kawhhran upa ka si lo tikah pastor hlawh pek daan ah theihthiamlo mi tampi ka nei. Asinan, ziangruangah kan Laimi pastor tamsawn harsa tukin kan khawsa ter timi lawngte cu ka thusuhnak leh mit khalin ka hmu ngei ih ka kut khalin ka tham ih ka langtertheinak, zalennak thawn tu ah ka ngan suak. Ziangasikhalle, kan pastor pawl hi harsa tuk lo dingin an livelihood hrang sumpai pe thei sehla…An mah le umnak ram le hmun zirin an hlawh punter daan thiam theu sehla…An laksawng dawnmi le member pawl ih an pekmi sumpai malte vek cu an hlawh bangin siarsak lo sehla etc…

Harsa tukih kan pastor pawl kan khawsat ter tikah an duh vekin thlarau rawl in cawm thei nawn lo. Sermon preparenak caan an neilo. Bible study tla an tuah man lo. An inn sang hrang hmanah caan an pe thei lo. Cuvek lakah member pawl cun a hnen ihsin thu thatha thei dingah kan expect lai hi cu…Theihthiam a har.

Kan pastor pawl hi kan tirethei tuk pang maw?

Ukte
Vahvaihnak
New Delhi